ନୂଆଦିଲ୍ଲୀ : ଦେଶରେ ଗରମର ପ୍ରକୋପ ଦିନକୁ ଦିନ ବଢିବାରେ ଲାଗିଛି । ଉତ୍ତର ଭାରତରେ ଖାସ୍ କରି ଦିଲ୍ଲୀ, ଉତ୍ତରପ୍ରଦେଶ, ବିହାର ଏବଂ ରାଜସ୍ଥାନରେ ଭୟଙ୍କର ଗରମ ଦେଖିବାକୁ ମିଳୁଛି । ଖରାର ପ୍ରକୋପ ବଢୁଥିବା ମଧ୍ୟରେ ପାଣିପାଗ ବିଭାଗ(IMD) ବର୍ଷା ସତର୍କତା ଜାରି କରିଛି ।
ସୂଚନାନୁଯାୟୀ, ଆଜି ଦିଲ୍ଲୀରେ ଗରମରୁ କୌଣସି ମୁକ୍ତି ମିଳିବ । ୟେଲୋ ଆଲର୍ଟ ଜାରି କରିଛି ପାଣିପାଗ ବିଭାଗ । ଏଥିସହିତ ୨୭ ଏପ୍ରିଲ ପର୍ଯ୍ୟନ୍ତ ହିଟୱେଭ୍ ଜାରି ରହିବା ସହିତ ୨୭ ତାରିଖରେ ସାମାନ୍ୟ ବର୍ଷା ହେବାର ସମ୍ଭାବନା ରହିଛି ବୋଲି ପାଣିପାଗ ବିଭାଗ ସୂଚନା ଦେଇଛି ।
ସେହିପରି ଉତ୍ତରପ୍ରଦେଶରେ ଗରମ ପ୍ରବାହ ପାଇଁ ଏପ୍ରିଲ୍ ୨୪ରୁ ୨୭ ପର୍ଯ୍ୟନ୍ତ ହିଟୱେଭ୍ ଜାରି କରାଯାଇଛି । ଉତ୍ତରପ୍ରଦେଶରେ ଏପ୍ରିଲ ୨୮ରୁ ଏପ୍ରିଲ ୩୦ ମଧ୍ୟରେ ବର୍ଷା ହେବାର ସମ୍ଭାବନା ରହିଛି । କିନ୍ତୁ ବିହାରରେ ଆସନ୍ତାକାଲିଠାରୁ ପାଗ କୋହଲା ରହିବ ବୋଲି ପାଣିପାଗ ବିଭାଗ ସୂଚନା ଦେଇଛି । ଏପ୍ରିଲ ୨୬ ଠାରୁ ପାଟନା, ଗୟା, ଭାଗଲପୁର ଏବଂ ଦରଭଙ୍ଗା ପାଇଁ ବଜ୍ରପାତ ସତର୍କତା ଜାରି କରିଛି ।
ଅନ୍ୟପଟେ ରାଜସ୍ଥାନର ବାରମେରରେ ସର୍ବାଧିକ ତାପମାତ୍ରା ୪୪.୧ ଡିଗ୍ରୀ ସେଲସିୟସ୍ ରେକର୍ଡ କରାଯାଇଛି । କିଛି ସ୍ଥାନରେ ସର୍ବାଧିକ ତାପମାତ୍ରା ଆହୁରି ୧ ରୁ ୨ ଡିଗ୍ରୀ ସେଲସିୟସ୍ ବୃଦ୍ଧି ପାଇବାର ସମ୍ଭାବନା ରହିଛି । ମହାରାଷ୍ଟ୍ରରେ ଆଗୁଆ ମୌସୁମୀ ବର୍ଷା ହେବାର ସୂଚନା ଦେଇଛି ପାଣିପାଗ ବିଭାଗ । ଏଥିସହ ଆଜି କୋଙ୍କଣ, ମରଠୱାଡା ଏବଂ ପଶ୍ଚିମ ମହାରାଷ୍ଟ୍ରର କିଛି ସ୍ଥାନରେ ଝଡ଼ବର୍ଷା ହେବାର ପୂର୍ବାନୁମାନ କରାଯାଇଛି । କିଛି ଜିଲ୍ଲାରେ କୁଆ ପଥର ବର୍ଷାର ମଧ୍ୟ ସମ୍ଭାବନା ରହିଛି । ପାଗକୁ ଦୃଷ୍ଟିରେ ରଖି ୟେଲୋ ଆଲର୍ଟ ଜାରି କରାଯାଇଛି ।
