ଜମ୍ମୁ କଶ୍ମୀର : ସମଗ୍ର ଦୁନିଆ ନୂଆବର୍ଷ ପାଳନ କରୁଥିବା ବେଳେ ପାକିସ୍ତାନ କିନ୍ତୁ ସୁଧୁରୁନି । ନୂଆବର୍ଷ ଅବସରରେ ଜମ୍ମୁ କଶ୍ମୀରର ପୁଞ୍ଛରେ ପାକିସ୍ତାନୀ ଡ୍ରୋନ ଦେଖିବାକୁ ମିଳିଛି । ଡ୍ରୋନ୍ ଦେଖିବା ପରେ ସେନା ପକ୍ଷରୁ ସର୍ଚ୍ଚ ଅପରେସନ ଜାରି ରହିଛି ।
ପାକିସ୍ତାନୀ ଡ୍ରୋନ ଏଲଓସି ନିକଟରେ ପୁଞ୍ଛର ଖାଡି କରମାଡା ଅଞ୍ଚଳରେ ଭାରତୀୟ ସୀମାରେ ପ୍ରବେଶ କରିଛି । ଡ୍ରୋନ ୫ ମିନିଟରୁ ଅଦିକ ସମୟ ଭାରତୀୟ ସୀମାରେ ଥିଲା ବୋଲି ଜଣାପଡିଛି । ଭାରତୀୟ ସେନା ଓ ଜମ୍ମୁ କଶ୍ମୀର ପୋଲିସ ସ୍ଥାନୀୟ ଅଞ୍ଚଳରେ ସର୍ଚ୍ଚ ଅପରେସନ ଆରମ୍ଭ କରିଛି । ଏଜେନ୍ସୀ ଡ୍ରୋନ ଉଡ଼ାଣ ଟ୍ରାକ୍ କରି ଯାଞ୍ଚ କରୁଛି ।
ଜମ୍ମୁ କଶ୍ମୀର ପ୍ରଶାସନ ତରଫରୁ ସୁରକ୍ଷାକୁ ଦେଖି ଗତ କିଛିଦିନରେ କେନ୍ଦ୍ର ଶାସିତ ଅଞ୍ଚଳରେ ଭିପିଏନ ବ୍ୟବହାର ଉପରେ ବ୍ୟାନ୍ ଲଗାଯାଇଛି । ରାଷ୍ଟ୍ରୀୟ ସୁରକ୍ଷାକୁ ବିପଦ ଏବଂ ଅଶାନ୍ତକୁ ଉସୁକାଇବା ଆଶଙ୍କାରେ ଏହା ଉପରେ ବ୍ୟାନ ଲଗାଯାଇଥିଲା । ଆଉ ଏବେ ଏଲଓସି ନିକଟରେ ଡ୍ରୋନ୍ ଦେଖିବାକୁ ମିଳିଛି ।
ଭାରତ-ପାକିସ୍ତାନ ସୀମା ନିକଟରେ ଗତ ୨୪ ଘଣ୍ଟା ଭିତରେ ଦ୍ବିତୀୟ ଥର ପାଇଁ ଡ୍ରୋନ ଦେଖିବାକୁ ମିଳିଛି । ଶାମ୍ବା ଜିଲ୍ଲାର ଫୁଲପୁର ନିକଟରେ ସନ୍ଦିଗ୍ଧ ଡ୍ରୋନ ଦେଖିବାକୁ ମିଳିଥିଲା । ସେହି ସମୟରେ ଡ୍ରୋନ କିଛି ସମୟ ପର୍ଯ୍ୟନ୍ତ ଭାରତୀୟ ସୀମାରେ ରହିଥିଲା ।
