ଆଇପିଏଲ ୨୦୨୬ ପ୍ଲେ ଅଫରୁ ପଞ୍ଜାବ କିଙ୍ଗସ ବାଦ୍ ପଡିବା ପରେ ସୋସିଆଲ ମିଡିଆରେ ପୁରୁଣା ଭିଡିଓ ଭାଇରଲ ହେଉଛି । ଏହି ଭିଡିଓକୁ ନେଇ ଲଗାତାର ଟ୍ରୋଲିଂର ଶିକାର ହେଉଥିବା ଶ୍ରେୟସ ଆୟରଙ୍କ ଭଉଣୀ ଶ୍ରେଷ୍ଠା ଆୟର ଏବେ ଟ୍ରୋଲର୍ସଙ୍କୁ କଡ଼ା ଜବାବ ଦେଇଛନ୍ତି । ସେ ଅଭିଯୋଗ କରିଛନ୍ତି, ଲୋକ କେବଳ ତାଙ୍କୁ ନୁହେଁ ବରଂ ଟିମର ଏବଂ କାର୍ଯ୍ୟ ସହିତ ଜଡିତ ଲୋକଙ୍କୁ ମଧ୍ୟ ହଇରାଣ କରୁଛନ୍ତି ।
ପେଶାରେ ଡ୍ୟାନ୍ସର ତଥା କୋରିଓଗ୍ରାଫର ଶ୍ରେଷ୍ଠା ଆୟର ସୋସିଆଲ ମିଡିଆରେ ଏକ ଭିଡିଓ କରି ନିରାଶ ହୋଇ କହିଛନ୍ତି, ଏକ ମଜାଳିଆ ଭିଡିଓକୁ ଭୁଲ୍ ଭାବେ ପରିବେଷଣ କରାଯାଇଛି । ଏବେ କିଛି ଲୋକ ଏହାର ଆଧାରରେ ଆମକୁ ଟାର୍ଗେଟ କରୁଛନ୍ତି ।
ପଞ୍ଜାବ କିଙ୍ଗସ ଟିମ୍ ଆଇପିଏଲ ୨୦୨୬ରୁ ବାଦ୍ ପଡିଛି । ୬ ଏପ୍ରିଲରେ ହୋଇଥିବା କୋଲକତା ନାଇଟ ରାଇଡର୍ସ ଏବଂ ପଞ୍ଜାବ କିଙ୍ଗସ ମଧ୍ୟରେ ହୋଇଥିବା ମ୍ୟାଚ୍ ବର୍ଷା ଯୋଗୁଁ ବାତିଲ ହୋଇଥିଲା । ତେଣୁ ଦୁଇଟି ଯାକ ଟିମକୁ ୧-୧ ପଏଣ୍ଟ ମିଳିଥିଲା । ସେତେବେଳେ ଶ୍ରେୟସ ଆୟରଙ୍କ ଭଉଣୀ ଏକ ଭିଡିଓ କରିଥିଲେ, ଆଉ ସେଥିରେ କହିଥିଲେ, ପଞ୍ଜାବୀଙ୍କ ହ୍ଦୟ ବହୁତ ବଡ । ସେ କେକେଆରକୁ ଟାର୍ଗେଟ କରି କହିଥିଲେ, ନିଅ ତୁମକୁ ମଧ୍ୟ ୧ ପଏଣ୍ଟ ଦିଆଗଲା ।
ଫ୍ୟାନ୍ସ ଭାବିଲେ କି, ଶ୍ରେଷ୍ଠା କେକେଆର ଟିମର ମଜାକ ଉଡାଇଛନ୍ତି, ଟିମର ଅପମାନ କରିଛନ୍ତି । ଆଉ ଏବେ ପଞ୍ଜାବ ଟିମ୍ ଆଇପିଏଲରୁ ବାଦ୍ ପଡିବା ପରେ ଟ୍ରୋଲର୍ସ ପୁରୁଣା ଭିଡିଓକୁ ଭାଇରଲ କରି ଶ୍ରେଷ୍ଠାଙ୍କ ଉପରେ ଖରାପ କମେଣ୍ଟ କରୁଛନ୍ତି । ଆଉ ଏହାକୁ ନେଇ ଶ୍ରେଷ୍ଠା ଭିଡିଓ କରି ଅପିଲ୍ କରିଛନ୍ତି କି, ଫ୍ୟାନ୍ସମାନେ ନିଜ ପରିବାର ଲୋକଙ୍କୁ ଟାର୍ଗେଟ ନ କରନ୍ତୁ ।
