ଫୁଟ୍‌ବଲ ବିଶ୍ବକପ୍‌ ଖେଳିବ ନାହିଁ ଇରାନ

ତେହେରାନ୍‌ : ପୁରୁଷ ଫିଫା ଫୁଟ୍‌ବଲ ବିଶ୍ବକପ୍‌ ଚଳିତବର୍ଷ ଜୁନ୍‌ ୧୧ରୁ ଆରମ୍ଭ ହେବ। ଏହି ବିଶ୍ବକପ୍‌କୁ ମିଳିତ ଭାବେ ଆମେରିକା, କାନାଡା ଓ ମେକ୍ସିକୋ ଆୟୋଜନ କରୁଛନ୍ତି। ଏହି ବିଶ୍ବକପ୍‌ ପାଇଁ ଯୋଗ୍ୟତା ହାସଲ କରିଥିଲେ ହେଁ ଇରାନ୍‌ ଖେଳିବ ନାହିଁ ବୋଲି ଏହାର କ୍ରୀଡ଼ାମନ୍ତ୍ରୀ ଅହମ୍ମଦ ଦୋନ୍ୟାମାଲି ସ୍ପଷ୍ଟ କରିଛନ୍ତି। ଦୁଇ ସପ୍ତାହ ହେଲା ଇସ୍ରାଏଲ୍‌ ଓ ଆମେରିକା ମିଳିତ ଭାବେ ଇରାନ ଉପରେ ପ୍ରଚଣ୍ଡ ଆକ୍ରମଣ ଚଳାଇଛନ୍ତି। ତେବେ ବୁଧବାର ଫିଫା ସଭାପତି ଜିଆନି ଇନ୍‌ଫାଣ୍ଟିନୋ କହିଥିଲେ ଯେ ଆମେରିକାର ରାଷ୍ଟ୍ରପତି ଡୋନାଲ୍‌ଡ ଟ୍ରମ୍ପ୍‌ ବିଶ୍ବକପ୍‌ରେ ଇରାନ ଦଳକୁ ସମ୍ପୂର୍ଣ୍ଣ ନିରାପତ୍ତା ଓ ଭବ୍ୟ ସ୍ବାଗତର ଗ୍ୟାରେଣ୍ଟି ଦେଇଛନ୍ତି। ଏହାର କିଛି ଘଣ୍ଟା ପରେ ଇରାନ୍‌ର କ୍ରୀଡ଼ାମନ୍ତ୍ରୀ କହିଛନ୍ତି ଯେ ଇରାନ ଫୁଟ୍‌ବଲ ଦଳ ବିଶ୍ବକପ୍‌ ଖେଳିବାର ପ୍ରଶ୍ନ ଉଠୁନାହିଁ। ତାଙ୍କ ଭାଷାରେ, ଆମେରିକାର ଦୁର୍ନୀତିଗ୍ରସ୍ତ ସରକାର ଆମ ସର୍ବୋଚ୍ଚ ନେତାଙ୍କୁ ହତ୍ୟା କରିଛନ୍ତି। କୌଣସି ପରିସ୍ଥିତିରେ ଆମେ ବିଶ୍ବକପ୍‌ ଖେଳିବାକୁ ଯିବୁନାହିଁ। ଆମର ଶିଶୁମାନେ ବି ସୁରକ୍ଷିତ ନୁହନ୍ତି। ଏପରି ପରିସ୍ଥିତିରେ ଆମ ଫୁଟ୍‌ବଲ ଦଳ ବିଶ୍ବକପ୍‌ ଖେଳିବାକୁ ଆମେରିକା ଯିବା ଅସମ୍ଭବ। ବିଶ୍ବକପ୍‌ରେ ଇରାନ ଗ୍ରୁପ୍ ‘ଜି’ରେ ସ୍ଥାନପାଇଛି। ଏହି ଗ୍ରୁପ୍‌ରେ ନ୍ୟୁଜିଲାଣ୍ଡ, ବେଲ୍‌ଜିୟମ୍‌ ଓ ଇଜିପ୍‌ଟ ରହିଛନ୍ତି। ଇରାନ ତା’ର ୩ଟିଯାକ ଗ୍ରୁପ୍‌ ମ୍ୟାଚ୍‌ ଆମେରିକାରେ ଖେଳିବାର ଅଛି। ଯଦି ଇରାନ ବିଶ୍ବକପ୍‌ରୁ ଓହରିଯାଏ; ତେବେ ଏହା ସ୍ଥାନରେ ଇରାକ ଖେଳିପାରେ।