କୋଲକତା : ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପିର ବିଜୟ ପରେ କୋଲକତାରେ ଏକ ଗୁରୁତ୍ୱପୂର୍ଣ୍ଣ ରାଜନୈତିକ ଦୃଶ୍ୟ ଦେଖିବାକୁ ମିଳିଛି । ସମାଜବାଦୀ ପାର୍ଟିର ସଭାପତି ଅଖିଳେଶ ଯାଦବ କୋଲକତାର କାଳୀଘାଟ ସ୍ଥିତ ବାସଭବନରେ ତୃଣମୂଳ କଂଗ୍ରେସ (TMC) ମୁଖ୍ୟ ମମତା ବାନାର୍ଜୀଙ୍କୁ ଭେଟିଛନ୍ତି ।
ଏହି ସାକ୍ଷାତକାର କେବଳ ଏକ ସୌଜନ୍ୟମୂଳକ ସାକ୍ଷାତ ନଥିଲା, ବରଂ ଏହା ଥିଲା ବିରୋଧୀ ଏକତାର ଏକ ବଡ଼ ପ୍ରଦର୍ଶନ। ଏହି ଆଲୋଚନାରେ ଟିଏମସି ସାଧାରଣ ସମ୍ପାଦକ ଅଭିଷେକ ବାନାର୍ଜୀ ମଧ୍ୟ ଉପସ୍ଥିତ ଥିଲେ । ବିଜେପି ପାଖରେ ନିର୍ବାଚନ ହାରିଥିଲେ ମଧ୍ୟ ଅଖିଳେଶ ମମତାଙ୍କୁ ଜଣେ ବୀର ଯୋଦ୍ଧା ବୋଲି କହିଛନ୍ତି ।
ଅଖିଳେଶ କହିଛନ୍ତି, ଆପଣ ହାରିନାହାନ୍ତି, ଆପଣ ଏକ ସାହସିକ ଲଢ଼େଇ ଲଢ଼ିଛନ୍ତି । ବିଜେପିର ବଢ଼ୁଥିବା ପ୍ରଭାବ ବିରୋଧରେ ଆପଣ ଏବେ ବି ଦେଶର ସବୁଠାରୁ ଶକ୍ତିଶାଳୀ ସ୍ୱର ।” ସମାଜବାଦୀ ପାର୍ଟି ଏବଂ ପୂରା ‘INDIA’ ବ୍ଲକ ମମତାଙ୍କ ସହ ଅଛି ବୋଲି ଅଖିଳେଶ ସ୍ପଷ୍ଟ କରିଛନ୍ତି।
ଉତ୍ତର ପ୍ରଦେଶରେ ୨୦୨୭ରେ ହେବାକୁ ଥିବା ନିର୍ବାଚନ ପୂର୍ବରୁ ଆଞ୍ଚଳିକ ଦଳଗୁଡ଼ିକୁ ଏକଜୁଟ କରିବା ପାଇଁ ଅଖିଳେଶ ଏହି ପ୍ରୟାସ ଆରମ୍ଭ କରିଛନ୍ତି ।
ନିର୍ବାଚନ ଫଳାଫଳ ପରେ ମମତା ବାନାର୍ଜୀ ତୁରନ୍ତ ଇସ୍ତଫା ଦେବାକୁ ମନା କରିଛନ୍ତି । ବିଜେପି ସରକାର ଗଠନ ପାଇଁ ପ୍ରସ୍ତୁତ ହେଉଥିବା ବେଳେ, ବିରୋଧୀ ନେତାମାନଙ୍କ ଏହି ଗସ୍ତ ପଶ୍ଚିମବଙ୍ଗର ରାଜନୈତିକ ପାଣିପାଗକୁ ଆହୁରି ଉଷ୍ମ କରିଦେଇଛି । କେବଳ ଅଖିଳେଶ ନୁହଁନ୍ତି, କଂଗ୍ରେସ ଏବଂ ଆରଜେଡି ଦଳ ମଧ୍ୟ ମମତାଙ୍କ ପ୍ରତି ସମର୍ଥନ ଜଣାଇଛନ୍ତି ।
