ଭୁବନେଶ୍ୱର : ରାଜ୍ୟର ରାସନ କାର୍ଡଧାରୀମାନଙ୍କୁ ସରକାର ଅତିରିକ୍ତ ଭାବେ ଅଧିକ ୫ କେଜି ଚାଉଳ ଯୋଗାଇ ଦେବାକୁ ନିଷ୍ପତ୍ତି ନେଇଛନ୍ତି। ଏହି ନିଷ୍ପତ୍ତି ଅନୁଯାୟୀ, ସେପ୍ଟେମ୍ବର, ଅକ୍ଟୋବର ଓ ନଭେମ୍ବର ୨୦୨୫ ମାସ ପାଇଁ ରାସନ କାର୍ଡଧାରୀଙ୍କୁ ମାସିକ ଅଧିକ ୫ କେଜି ସୁଦୃଢ଼ (Fortified) ଚାଉଳ ମାଗଣାରେ ବଣ୍ଟନ କରାଯିବ। ଏ ନେଇ ଯୋଗାଣ ବିଭାଗ ପକ୍ଷରୁ ସମସ୍ତ ଜିଲ୍ଲାପାଳଙ୍କୁ ଚିଠି ଲେଖାଯାଇଛି।
ଏହି ଅତିରିକ୍ତ ଚାଉଳ ବଣ୍ଟନ ମୋଟ୍ ୧୯ ଟି ଜିଲ୍ଲା (ଅନୁଗୁଳ, ବାଲେଶ୍ୱର, ବରଗଡ଼, ଭଦ୍ରକ, କଟକ, ଦେବଗଡ଼, ଢେଙ୍କାନାଳ, ଗଞ୍ଜାମ, ଜଗତସିଂହପୁର, ଯାଜପୁର, ଝାରସୁଗୁଡା, କଳାହାଣ୍ଡି, କେନ୍ଦୁଝର, ଖୋର୍ଦ୍ଧା, ମୟୂରଭଞ୍ଜ, ନୟାଗଡ଼, ପୁରୀ, ସମ୍ବଲପୁର ଓ ସୁନ୍ଦରଗଡ)ରେ କାର୍ଯ୍ୟକାରୀ ହେବ।
ସେପ୍ଟେମ୍ବର, ଅକ୍ଟୋବର ଏବଂ ନଭେମ୍ବର ମାସ ପାଇଁ ରାଜ୍ୟ ପୁଲରୁ ମୋଟ୍ ୧୦,୫୭,୧୧୨.୭୦ କ୍ୱିଣ୍ଟାଲ୍ ଅତିରିକ୍ତ ଚାଉଳ ଆବଣ୍ଟନ କରାଯାଇଛି। NFSA (ଜାତୀୟ ଖାଦ୍ୟ ସୁରକ୍ଷା ଆଇନ) ଏବଂ SFSS (ରାଜ୍ୟ ଖାଦ୍ୟ ସୁରକ୍ଷା ଯୋଜନା) ଅଧୀନରେ ଥିବା ଯୋଗ୍ୟ ପରିବାରମାନଙ୍କୁ ସେମାନଙ୍କର ନିୟମିତ ଚାଉଳ ଅଧିକାର ବ୍ୟତୀତ ଏହି ଅତିରିକ୍ତ ୫ କେଜି ଚାଉଳ ମାଗଣାରେ ଦିଆଯିବ। ଜିଲ୍ଲାପାଳମାନେ ବୈଧ ଲାଇସେନ୍ସ ଥିବା ଉଚିତ ମୂଲ୍ୟ ଦୋକାନଗୁଡ଼ିକୁ (FPS) ଚାଉଳ ମୁକ୍ତ କରିବାକୁ ନିର୍ଦ୍ଦେଶ ଦିଆଯାଇଛି ଏବଂ ବଣ୍ଟନ ତଥ୍ୟର ସମୟାନୁସାରେ e-PoS ସର୍ଭର ସହିତ ସିଙ୍କ୍ରୋନାଇଜେସନ୍ ସୁନିଶ୍ଚିତ କରିବାକୁ କୁହାଯାଇଛି।
