ସ୍କୁଲରେ ଭାଷା ସାହିତ୍ୟ ଓ ସୃଜନଶୀଳତା ଉତ୍ସବ ପାଳନ ନିଷ୍ପତ୍ତି ନେଲେ ନବୀନ

ସୂଚନା ଅନୁସାରେ, ବିଗତ ୨୩ବର୍ଷ ମଧ୍ୟରେ ପ୍ରଥମଥର ପାଇଁ ବିଶ୍ୱ ଓଡ଼ିଆ ଭାଷା ସମ୍ମିଳନୀ ଆୟୋଜନ କରୁଥିବା ନବୀନ ପଟ୍ଟନାୟକ ସରକାର ସ୍କୁଲଗୁଡ଼ିକରେ ବି ଭାଷା ସାହିତ୍ୟ ଓ ସୃଜନଶୀଳତା ଉତ୍ସବ ପାଳନ କରାଇବାକୁ ନିଷ୍ପତ୍ତି ନେଇଛନ୍ତି । ପୁରାତନ ଛାତ୍ରଛାତ୍ରୀ ଓ ଅଭିଭାବକଙ୍କୁ ଏହି ସ୍କୁଲର ଭାଷା ଉତ୍ସବରେ ସାମିଲ ହେବେ । ଆସନ୍ତା ଫେବୃୟାରୀ ୩ରୁ ୫ତାରିଖ ପର୍ଯ୍ୟନ୍ତ ରାଜ୍ୟ ସରକାର ‘ ପ୍ରଥମ ବିଶ୍ୱ ଓଡ଼ିଆ ଭାଷା ସମ୍ମିଳନୀ’ ଆୟୋଜନ କରୁଛନ୍ତି । ଏନେଇ ଗାଁ ଗହଳିରେ ଅଧିକ ପ୍ରଚାରପ୍ରସାର କରିବା ପାଇଁ ଜାନୁୟାରୀ ୧୬ରୁ ୨୦ତାରିଖ ମଧ୍ୟରେ ହାଇସ୍କୁଲସ୍ତରରେ ଓ ଫେବୃୟାରୀ ୩ରୁ ୫ତାରିଖ ମଧ୍ୟରେ ପ୍ରାଥମିକ ସ୍କୁଲସ୍ତରରେ ‘ଭାଷା ସାହିତ୍ୟ ଓ ସୃଜନଶୀଳତା’ ଉତ୍ସବ ପାଳନ କରିବେ।ଏହି ଉତ୍ସବର ନାଁ ‘ମୋ କଥା ମୋ କାହାଣୀ’ ରଖାଯାଇଛି । ରାଜ୍ୟର ସମସ୍ତ ପ୍ରାଥମିକ ସ୍କୁଲ ସମେତ ସମସ୍ତ ସରକାରୀ ଓ ସରକାରୀ ଅନୁଦାନ ପ୍ରାପ୍ତ ହାଇସ୍କୁଲରେ ଏହି କାର୍ଯ୍ୟକ୍ରମ ହେବ । ଫେବୃୟାରୀ ୩ତାରିଖରେ ପ୍ରାଥମିକ ସ୍କୁଲସ୍ତରରେ, ୪ ଓ  ୫ତାରିଖରେ ବ୍ଲକସ୍ତରୀୟ ଓ ଜିଲ୍ଲାସ୍ତରୀୟ ଛାତ୍ରଛାତ୍ରୀଙ୍କ ଦ୍ୱାରା ଏହି କାର୍ଯ୍ୟକ୍ରମ କରାଯିବାର ବ୍ୟବସ୍ଥା ହୋଇଛି । ଅପରାହ୍ନରେ ଛାତ୍ରଛାତ୍ରୀଙ୍କ ଦ୍ୱାରା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବା ସହ ଶ୍ରେଷ୍ଠ ହାଉସ୍ ଓ ଅନ୍ୟାନ୍ୟ ପୁରସ୍କାର ଅତିଥିମାନଙ୍କ ଦ୍ୱାରା ପ୍ରଦାନ କରାଯିବାର କାର୍ଯ୍ୟକ୍ରମ ରହିଛି ।