ମାତ୍ର ୧୪ ବର୍ଷ ବୟସରେ ବୈଭବ ସୂର୍ଯ୍ୟବଂଶୀ ଭାରତୀୟ କ୍ରିକେଟରେ ଏକ ନୂଆ ଉତ୍ସାହ ସୃଷ୍ଟି କରିଛନ୍ତି । ଜୁନିୟର ଏବଂ ଘରୋଇ କ୍ରିକେଟରେ ତାଙ୍କର ପ୍ରଦର୍ଶନ ସମସ୍ତଙ୍କୁ ଚକିତ କରିଛି । ତାଙ୍କର ପରିଚୟ କୌଣସି ପ୍ରଚାର ବା ‘ହାଇପ୍’ରୁ ନୁହେଁ, ବରଂ ଲଗାତାର ରନ୍ କରିବା ଏବଂ ମ୍ୟାଚରେ ପରିବର୍ତ୍ତନ ଆଣିବା କ୍ଷମତାରୁ ତିଆରି ହୋଇଛି । ଖୁବ୍ କମ୍ ବୟସରେ ସେ ଦେଖାଇଛନ୍ତି ଯେ ସେ ଖେଳକୁ ଭଲ ଭାବେ ବୁଝନ୍ତି, ରିସ୍କ ନେବାକୁ ଡରନ୍ତି ନାହିଁ ଏବଂ ପରିସ୍ଥିତି ଯାହା ବି ହେଉ, ବ୍ୟାଟିଂର ଏକ ବଡ଼ ପ୍ରଭାବ ଛାଡି ହିଁ ଫେରନ୍ତି ।ଗତ ଆଇପିଏଲ୍ ସିଜିନରେ ପ୍ରଥମ ଥର ପାଇଁ ବଡ଼ ମଞ୍ଚରେ ପାଦ ଦେଇ ବୈଭବ ହାତରେ ବ୍ୟାଟ୍ ଧରିବା ମାତ୍ରେ ନିଜର ଉଦ୍ଦେଶ୍ୟ ସ୍ପଷ୍ଟ କରିଦେଇଥିଲେ । ଏହାପରେ ଇଂଲଣ୍ଡ, ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକାରେ ଅଣ୍ଡର-୧୯ ସ୍ତରରେ ତାଙ୍କର ଇନିଂସଗୁଡ଼ିକ ଚର୍ଚ୍ଚାର ବିଷୟ ପାଲଟିଥିଲା । ବିଭିନ୍ନ ପିଚ୍ ଏବଂ ପରିସ୍ଥିତିରେ ଖେଳି ସେ ବାରମ୍ବାର ଦେଖାଇଛନ୍ତି ଯେ ସେ ବଲକୁ ସହଜରେ ଏୟାରରେ ଉଠାଇ ପାରିବେ, ଲମ୍ବା ସଟ୍ ଖେଳିପାରିବେ ଏବଂ ରନ୍ ଗତିକୁ ଦ୍ରୁତ କରିପାରିବେ । ଏହି କାରଣରୁ ତାଙ୍କୁ ଅଣ୍ଡର-୧୯ କ୍ରିକେଟର ‘ନୂଆ ମାନକ’ କୁହାଯାଉଛି । ତାଙ୍କ ବ୍ୟାଟିଂରେ ଯେଉଁ କଥାଟି ସବୁଠାରୁ ଅଧିକ ଦୃଷ୍ଟି ଆକର୍ଷଣ କରେ, ତାହା ହେଉଛି ମ୍ୟାଚ୍ ଉପରେ ତୁରନ୍ତ ପ୍ରଭାବ ପକାଇବାର କ୍ଷମତା । ମଇଦାନକୁ ଆସିବା ମାତ୍ରେ ରନ୍ କରିବା, ଗ୍ୟାପ୍ ଖୋଜିବା, ଚୌକା-ଛକା ମାରିବା ଏବଂ ବିପକ୍ଷ ଦଳ ଉପରେ ଚାପ ପକାଇବା – ଏସବୁ ସେ ଏତେ କମ୍ ବୟସରେ ଶିଖିଛନ୍ତି । ତାଙ୍କ ଖେଳରେ କୌଣସି ଦ୍ୱନ୍ଦ୍ୱ କିମ୍ବା ବୟସର ପ୍ରଭାବ ଦେଖାଯାଏ ନାହିଁ । ବୋଧହୁଏ ସେଥିପାଇଁ ସେ ଯେଉଁଠାରେ ବି ଖେଳିଛନ୍ତି, ସେଠାରେ ତାଙ୍କର ପୂର୍ଣ୍ଣ ପ୍ରଭାବ ଦେଖିବାକୁ ମିଳିଛି ।
ଏବେ ଭବିଷ୍ୟତର ଚିତ୍ର ସ୍ପଷ୍ଟ – ଅଣ୍ଡର-୧୯ ବିଶ୍ୱକପ୍ ତାଙ୍କ ସାମ୍ନାରେ ଅଛି ଏବଂ ଏହାପରେ ରାଜସ୍ଥାନ ରୟାଲ୍ସ ସହିତ ଆଇପିଏଲର ସମ୍ପୂର୍ଣ୍ଣ ସିଜିନ୍ । ଏହି ଦୁଇଟି ବଡ଼ ଟୁର୍ଣ୍ଣାମେଣ୍ଟକୁ ଦୃଷ୍ଟିରେ ରଖି ବୈଭବଙ୍କ ପ୍ରତି ଆଶା ବଢିବା ସ୍ୱାଭାବିକ । କ୍ରିକେଟ୍ ଜଗତ ଦେଖିବାକୁ ଚାହୁଁଛି ଯେ ଏହି ଯୁବ ବ୍ୟାଟର ଚାପ, ଦାୟିତ୍ୱ ଏବଂ ବଡ଼ ମଞ୍ଚରେ କିପରି ପ୍ରଦର୍ଶନ କରୁଛନ୍ତି । ତାଙ୍କର ଏହି ଚମତ୍କାର ନିରନ୍ତରତା ଅଭିଜ୍ଞ ଭାରତୀୟ ସ୍ପିନର ରବିଚନ୍ଦ୍ରନ୍ ଅଶ୍ୱିନଙ୍କୁ ମଧ୍ୟ ପ୍ରଭାବିତ କରିଛି । ଅଶ୍ୱିନ ଏକ୍ସରେ ବୈଭବଙ୍କ ଗତ ୩୦ ଦିନର ସ୍କୋର ସେୟାର କରିଛନ୍ତି- ୧୭୧(୯୫), ୫୦(୨୬), ୧୯୦(୮୪), ୬୮(୨୪), ୧୦୮*(୬୧), ୪୬(୨୫) ଏବଂ ୧୨୭(୭୪) । ଏହି ପରିସଂଖ୍ୟାନ ଦେଖି ଅଶ୍ୱିନ ଲେଖିଛନ୍ତି, ‘୧୪ ବର୍ଷ ବୟସରେ ଏହି ପିଲାଟି ଯାହା କରୁଛି, ତାହା ଶବ୍ଦରେ ବୁଝାଇବା କଷ୍ଟକର।’ ଜଣେ ୧୪ ବର୍ଷର ଖେଳାଳିଙ୍କ ବିଷୟରେ ଭାରତୀୟ ଦଳର ଜଣେ ବରିଷ୍ଠ ଖେଳାଳିଙ୍କ ଏହି ପ୍ରତିକ୍ରିୟା ସୂଚାଉଛି ଯେ ବୈଭବଙ୍କ ବ୍ୟାଟିଂ କେବଳ ଚର୍ଚ୍ଚା ନୁହେଁ, ବରଂ ଏକ ଗୁରୁତର ସମ୍ଭାବନା ।
ଅଶ୍ୱିନ ଆହୁରି ମଧ୍ୟ ଲେଖିଛନ୍ତି ଯେ ଆଗାମୀ ଚାରି ମାସ ବୈଭବଙ୍କ କ୍ୟାରିୟରର ପ୍ରକୃତ ପରୀକ୍ଷା ହେବ- ପ୍ରଥମେ ଅଣ୍ଡର-୧୯ ବିଶ୍ୱକପ୍, ତା’ପରେ ଆଇପିଏଲର ସମ୍ପୂର୍ଣ୍ଣ ସିଜିନ୍, ଯେଉଁଠାରେ ତାଙ୍କୁ ଓପନର୍ ଭାବରେ ଓହ୍ଲାଇବାକୁ ପଡିପାରେ। ଏହି ସମୟ ତାଙ୍କର ସ୍ୱଭାବ, ଖେଳ ପ୍ରତି ଭୋକ ଏବଂ ଚରିତ୍ରକୁ ପରଖିବ, ଏବଂ ସମଗ୍ର କ୍ରିକେଟ୍ ସମାଜ ଏହା ଦେଖିବାକୁ ଉତ୍ସୁକ ଅଛି । ଭାରତୀୟ କ୍ରିକେଟ୍ ଅନେକ କମ୍ ବୟସର ତାରକା ଦେଖିଛି, କିନ୍ତୁ ବୈଭବ ସୂର୍ଯ୍ୟବଂଶୀଙ୍କ ଭଳି ଦ୍ରୁତ ଗତି ଏବଂ ପ୍ରଭାବର ଉଦାହରଣ ଖୁବ୍ କମ୍ ମିଳେ । ସେ କେତେ ଦୂର ପହଞ୍ଚିବେ ତାହା କହିବା ଏବେ ଶୀଘ୍ର ହୋଇପାରେ, କିନ୍ତୁ ଏତିକି ନିଶ୍ଚିତ ଯେ ସେ ୧୪ ବର୍ଷ ବୟସରେ କେବଳ ରନ୍ କରିନାହାଁନ୍ତି- ସେ ସମସ୍ତଙ୍କ ମନରେ ଏକ ବଡ଼ ଆଶା ଜଗାଇଛନ୍ତି ।
