ମୁମ୍ବାଇ : ଅଭିନେତା ସଲମାନ ଖାଁଙ୍କ ଘର ନିକଟରେ ହୋଇଥିବା ଗୁଳିକାଣ୍ଡ ଘଟଣାରେ ଏକ ବଡ଼ ଖବର ଆସିଛି । ସୂଚନା ଅନୁସାରେ ପଞ୍ଜାବରୁ ବନ୍ଧୁକ ଯୋଗାଉଥିବା ଦୁଇ ଅଭିଯୁକ୍ତଙ୍କୁ ମୁମ୍ବାଇ କ୍ରାଇମବ୍ରାଞ୍ଚ ଗିରଫ କରିଛି। ଦୁଇ ଅଭିଯୁକ୍ତ ମାର୍ଚ୍ଚ ୧୫ ରେ ମୁମ୍ବାଇର ପାନଭେଲରେ ପହଞ୍ଚିଥିଲେ ଏବଂ ଦୁଇଟି ବନ୍ଧୁକ ଯୋଗାଇ ଫେରିଥିଲେ।ମୁମ୍ବାଇ କ୍ରାଇମବ୍ରାଞ୍ଚ ର ସୂଚନା ଅନୁଯାୟୀ, ଧରାପଡ଼ିଥିବା ଏହି ଦୁଇ ଅଭିଯୁକ୍ତ ଗୁଳିଚଳାଇଥିବା ଦୁଇ ସୁଟରଙ୍କୁ ସାହାଯ୍ୟ କରିଥିଲେ। ପ୍ରଥମ ଅଭିଯୁକ୍ତଙ୍କ ନାମ ସୋନୁ ସୁଭାଷ ଚନ୍ଦର, ଯାହାଙ୍କ ବୟସ ୩୭ ବର୍ଷ। ସୋନୁଙ୍କର ଏକ ଚାଷ ଏବଂ ଭଡ଼ା ଦୋକାନ ମଧ୍ୟ ଅଛି । ଅନ୍ୟ ଅଭିଯୁକ୍ତ ଜଣକ ହେଲେ ଅନୁଜ ଥାପନ (୩୨)। ସେ ଟ୍ରକ୍ ହେଲପର ଭାବେ କାମ କରୁଥିଲେ ଏବଂ ଲରେନ୍ସ ବିଷ୍ନୋଇ ଗ୍ୟାଙ୍ଗ ସହ ଯୋଗାଯୋଗରେ ଥିଲେ। ଅନୁଜଙ୍କ ନାଁରେ ଦାଦାବଟି ଓ ଅସ୍ତ୍ରଶସ୍ତ୍ର ଆଇନ ରେ ମାମଲା ରହିଛି।
ସେପଟେ ସଲମାନଙ୍କ ଘର ବାହାରେ ଗୁଳି ଚଳାଇଥିବା ଦୁଇ ସୁଟର ଆଜି କୋର୍ଟରେ ହାଜର ହୋଇଥିଲେ । ପୁଲିସ ଉଭୟଙ୍କୁ ୪ ଦିନିଆ ରିମାଣ୍ଡରେ ନେବାକୁ ଆବେଦନ କରିଥିଲା, ଯାହାକୁ ମଞ୍ଜୁର କରାଯାଇଛି। ଆଜି ଗୁଳିକାଣ୍ଡ ମାମଲାରେ ମୁମ୍ବାଇ ପୁଲିସ କ୍ରାଇମବ୍ରାଞ୍ଚ କୋର୍ଟଙ୍କୁ କହିଛି ଯେ ଅଭିଯୁକ୍ତମାନେ ପରିଚୟ ନ ପାଇବା ପାଇଁ ତିନି ଥର ପୋଷାକ ବଦଳାଇଥିଲେ। ଉଭୟଙ୍କ ପାଖରେ ମୋଟ ୪୦ଟି ଗୁଳି ଥିବା ବେଳେ ସେଥିରୁ ୫ଟି ଗୁଳି ଚାଳନା କରାଯାଇଥିଲା। ପୁଲିସ ୧୭ଟି ଗୁଳି ଜବତ କରିଥିବା ବେଳେ ବାକି ଗୁଳିର ଖୋଳତାଡ଼ ଜାରି ରହିଛି।
