ନୂଆଦିଲ୍ଲୀ: ନାଗରିକତା ସଂଶୋଧନ ଅଧିନିୟମ, ୨୦୧୯ (ସିଏଏ)ର କାର୍ଯ୍ୟକାରିତା ଉପରେ ରୋକ୍ ଲଗାଇବା ପାଇଁ କେରଳ ସୁପ୍ରିମକୋର୍ଟରେ ଏକ ନୂତନ ପିଟିସନ ଦାଖଲ କରି ଦର୍ଶାଇଛି ଯେ ଏହି ନିୟମ ଭେଦଭାବପୂର୍ଣ୍ଣ, ମନମୁଖୀ ଏବଂ ଧର୍ମନିରପେକ୍ଷତା ନୀତିର ଉଲ୍ଲଂଘନ କରୁଛି।
୨୦୧୯ରେ ସଂସଦରେ ଏହି ଆଇନ ପାରିତ ହେବାର ପାଖାପାଖି ୪ ବର୍ଷ ପରେ ଅର୍ଥାତ ମାର୍ଚ୍ଚ ୧୧ତାରିଖରେ କେନ୍ଦ୍ର ସରକାର ଏହାକୁ କାର୍ଯ୍ୟକାରୀ କରିବା ପାଇଁ ବାଟ ଖୋଲିଥିଲେ। ଏହି ଆଇନ ଅନୁସାରେ ୨୦୧୪ ଡିସେମ୍ବର ୩୧ ପୂର୍ବରୁ ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନରୁ ଭାରତକୁ ଆସିଥିବା ଅଣମୁସଲମାନ ପ୍ରବାସୀଙ୍କୁ ଭାରତୀୟ ନାଗରିକତା ପ୍ରଦାନ କରାଯିବ।
କେରଳ ସରକାର ସିଏଏ ନିୟମକୁ ଅସାମ୍ବିଧାନିକ ବୋଲି କହିବା ସହ ଧର୍ମ ଓ ଦେଶ ଆଧାରରେ ବର୍ଗୀକରଣ ଭେଦଭାବପୂର୍ଣ୍ଣ, ମନମୁଖୀ, ଅଯୌକ୍ତିକ ଏବଂ ଧର୍ମନିରପେକ୍ଷତା ନୀତିର ଉଲ୍ଲଂଘନ ବୋଲି କହିଛନ୍ତି। ନାଗରିକତା ସଂଶୋଧନ ଆଇନ, ୨୦୧୯ର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରୁଥିବା ପିଟିସନଗୁଡ଼ିକର ସମାଧାନ ନହେବା ପର୍ଯ୍ୟନ୍ତ ନାଗରିକତା ସଂଶୋଧନ ନିୟମ, ୨୦୨୪ର କାର୍ଯ୍ୟକାରିତା ଉପରେ ରୋକ୍ ଲଗାଇବାକୁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେବାକୁ ଆବେଦନଗୁଡ଼ିକର ଶୁଣାଣି କରିବାକୁ ସୁପ୍ରିମକୋର୍ଟ ଶୁକ୍ରବାର ରାଜି ହୋଇଛନ୍ତି।
