ଥିରୁବନ୍ତପୁରମ: ୨୦୧୬ରେ ପେରୁମ୍ବାଭୁରରେ ଜଣେ ୩୦ ବର୍ଷୀୟା ଦଳିତ ଆଇନ ଛାତ୍ରୀଙ୍କୁ ଦୁଷ୍କର୍ମ ଓ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇଥିବା ଅମୀରୁଲ ଇସଲାମଙ୍କ ଫାଶୀ ଦଣ୍ଡାଦେଶକୁ କେରଳ ହାଇକୋର୍ଟ ସୋମବାର ବଜାୟ ରଖିଛନ୍ତି। ସେସନ୍ସ କୋର୍ଟଙ୍କ ରାୟ ବିରୋଧରେ ଇସଲାମଙ୍କ ଆବେଦନକୁ ହାଇକୋର୍ଟ ଖାରଜ କରିବା ସହ ଫାଶୀ ଦଣ୍ଡାଦେଶକୁ ସୁନିଶ୍ଚିତ କରିଛନ୍ତି। ଏହି ମାମଲାର ଶୁଣାଣି କରି ଅଦାଲତ କହିଥିଲେ ଯେ ସେସନ୍ସ କୋର୍ଟରୁ ଫାଶୀ ଦଣ୍ଡାଦେଶ ରେଫରେନ୍ସ ଆଧାରରେ ଫାଶୀ ଦଣ୍ଡର ନିଶ୍ଚିତତା ମଧ୍ୟ କରାଯାଇଛି।
ସୂଚନାଯୋଗ୍ୟ, ଆସାମର ପ୍ରବାସୀ ଶ୍ରମିକ ଅମୀରୁଲ ଇସଲାମଙ୍କ ବିରୋଧରେ ୨୦୧୬ ଏପ୍ରିଲ ୨୮ ତାରିଖରେ ମହିଳାଙ୍କୁ ନିର୍ମମ ଆକ୍ରମଣ, ଦୁଷ୍କର୍ମ ଓ ହତ୍ୟା ଅଭିଯୋଗ ହୋଇଥିଲା। ଏକ ଗରିବ ପରିବାରରୁ ଆସିଥିବା ପୀଡ଼ିତାଙ୍କୁ ତାଙ୍କ ଘରେ ହତ୍ୟା କରାଯିବା ପୂର୍ବରୁ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିଲା।
୨୦୧୭ରେ ଏର୍ଣ୍ଣାକୁଲମ୍ ପ୍ରିନ୍ସିପାଲ ସେସନ୍ସ କୋର୍ଟ ଭାରତୀୟ ଦଣ୍ଡବିଧି ସଂହିତା (ଆଇପିସି)ର ବିଭିନ୍ନ ଧାରା ଅନୁଯାୟୀ ଇସଲାମକୁ ଏହି ମାମଲାରେ ଦୋଷୀ ସାବ୍ୟସ୍ତ କରିଥିଲେ, ଯେଉଁଥିରେ ଅସଦାଚରଣ, ହତ୍ୟା ଏବଂ ଦୁଷ୍କର୍ମ ପାଇଁ ଦଣ୍ଡନୀୟ ଅପରାଧ କରିବା ସହ ଘରେ ଅନୁପ୍ରବେଶ ଅନ୍ତର୍ଭୁକ୍ତ ଥିଲା। ସେସନ୍ସ କୋର୍ଟ ଇସଲାମଙ୍କୁ ତାଙ୍କ ଜଘନ୍ୟ ଅପରାଧ ପାଇଁ ମୃତ୍ୟୁଦଣ୍ଡ ରେ ଦଣ୍ଡିତ କରିଥିଲେ।
ଘଟଣାରେ ଇସଲାମଙ୍କ ସମ୍ପୃକ୍ତି ଜାଣିବା ପାଇଁ ସ୍ୱତନ୍ତ୍ର ତଦନ୍ତକାରୀ ଦଳ (ଏସଆଇଟି) ଡିଏନଏ ଟେକ୍ନୋଲୋଜି ଏବଂ କଲ୍ ରେକର୍ଡ ଭେରିଫିକେସନ୍ ବ୍ୟବହାର କରିଥିଲା। ଅପରାଧ ପରେ ଇସଲାମ ପେରୁମ୍ବାଭୁରରୁ ଫେରାର ହୋଇଯାଇଥିଲା। କିନ୍ତୁ ୫୦ ଦିନ ପରେ ତାମିଲନାଡୁର କାଞ୍ଚିପୁରମରୁ ତାଙ୍କୁ ଗିରଫ କରାଯାଇଥିଲା। ଏହି ତଦନ୍ତରେ ୧୦୦ରୁ ଅଧିକ ପୁଲିସ କର୍ମଚାରୀ ସାମିଲ ହେବା ସହ ୧୫୦୦ରୁ ଅଧିକ ଲୋକଙ୍କୁ ପଚରାଉଚରା କରା ଯାଇଥିଲା।
