ଦୁଇଟି ଆସନରୁ ଲଢିବେ ରାହୁଲ ଗାନ୍ଧୀ

ଲୋକସଭା ନିର୍ବାଚନ ନେଇ ଇଣ୍ଡିଆ ମେଣ୍ଟର ଆସନ ବୁଝାମଣା ହୋଇନଥିବା ବେଳେ କିଛି ଚିରାଚରିତ ଆସନ ନେଇ ଚିତ୍ର ସ୍ପଷ୍ଟ ହେବାରେ ଲାଗିଛି । କଂଗ୍ରେସର ପୂର୍ବତନ ଅଧ୍ୟକ୍ଷ ତଥା ଏବେର ସାଂସଦ ରାହୁଲ ଗାନ୍ଧୀ ଉତ୍ତର ପ୍ରଦେଶର ଆମେଠୀ ଓ କେରଳର ୱାଇନାଡୁ ଆସନରୁ ନିର୍ବାଚନ ଲଢିବେ । ଏନେଇ କଂଗ୍ରେସ ତରଫରୁ କୌଣସି ସୂଚନା ଦିଆଯାଇନଥିଲେ ବି ସୂତ୍ର ସୂଚନା ଆଧାରରେ ଏଭଳି ଖବର ଆସିଛି । ସେହିଭଳି କଂଗ୍ରେସର ମହାସଚିବ ପ୍ରିୟଙ୍କା ଗାନ୍ଧୀ ଏଥର ରାଏବରେଲୀ ଆସନରୁ ନିର୍ବାଚନ ଲଢିବାକୁ ଯାଉଛନ୍ତି ।ଆମେଠୀରୁ ବିଜେପି ପୁଣିଥରେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କୁ ପ୍ରାର୍ଥୀ କରିବା ନେଇ ଘୋଷଣା କରିଛି । ଗତ ଲୋକସଭା ନିର୍ବାଚନରେ ସ୍ମୃତି ଇରାନୀ ରାହୁଲ ଗାନ୍ଧୀଙ୍କୁ ଆମେଠୀ ଆସନରେ ପରାଜିତ କରିଥିଲେ । ସେହିଭଳି କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ପ୍ରଥମଥର ପାଇଁ ଲୋକସଭା ନିର୍ବାଚନ ଲଢିବାକୁ ଯାଉଛନ୍ତି । ପ୍ରିୟଙ୍କା ଗାନ୍ଧୀ ଯେଉଁ ରାଏବରେଲୀ ଆସନରୁ ନିର୍ବାଚନ ଲଢିବାକୁ ଯାଉଛନ୍ତି ତାହା ତାଙ୍କ ମା, ତଥା କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଚିରାଚରିତ ଆସନ ।