ପାକିସ୍ତାନ ପିପୁଲ୍ସ ପାର୍ଟି ଏବଂ ପାକିସ୍ତାନ ମୁସଲିମ ଲିଗ-ନୱାଜ ସରକାର ଗଠନ ପାଇଁ ଏକ ନୂତନ ମିଳିତ ମଞ୍ଚ ଗଠନ କରିଛନ୍ତି । ମିଳିତ ମଞ୍ଚ ତରଫରୁ ପ୍ରଧାନମନ୍ତ୍ରୀ ପଦ ପାଇଁ ଶାହବାଜ ସରିଫଙ୍କୁ ମନୋନୀତ କରାଯାଇଛି । ସୋମବାର ଦିନ ଉଭୟ ଦଳ କେନ୍ଦ୍ରରେ ଏକ ମିଳିତ ସରକାର ଗଠନ ପାଇଁ କ୍ଷମତା ବଣ୍ଟନ ଫର୍ମୁଲା ଘୋଷଣା କରିଛନ୍ତି ।ଦୀର୍ଘ ୧୦ ଦିନର ଆଲୋଚନା ପରେ ପାକିସ୍ତାନ ମୁସଲିମ ଲିଗ୍ (ପିଏମଏଲ-ଏନ) ଏବଂ ପାକିସ୍ତାନ ପିପୁଲ୍ସ ପାର୍ଟି (ପିପିପି) ମଧ୍ୟରେ ସରକାର ଗଠନ ପାଇଁ ଚୂଡ଼ାନ୍ତ ଚୁକ୍ତି ହୋଇଛି । PML-N ଅଧ୍ୟକ୍ଷ ତଥା ପୂର୍ବତନ ପ୍ରଧାନମନ୍ତ୍ରୀ ଶେହବାଜ ସରିଫ ମଙ୍ଗଳବାର କହିଛନ୍ତି ଯେ ସରକାର ଗଠନ ପାଇଁ ପାକିସ୍ତାନ ପିପୁଲ୍ସ ପାର୍ଟି ଏବଂ ପାକିସ୍ତାନ ମୁସଲିମ ଲିଗ୍-ନୱାଜଙ୍କ ପାଖରେ ସଂଖ୍ୟାଗରିଷ୍ଠତା ରହିଛି ।ଫେବୃଆରୀ ୮ ରେ ଅନୁଷ୍ଠିତ ନିର୍ବାଚନ ପରେ ପାକିସ୍ତାନରେ କୌଣସି ଦଳ ସଂଖ୍ୟାଗରିଷ୍ଠତା ପାଇ ପାରିନଥିଲେ । ଏହା ପରେ ପାକିସ୍ତାନର ସମସ୍ତ ଦଳ ମିଳିତ ମେଣ୍ଟ ପାଇଁ କସରତ ଆରମ୍ଭ କରିଦେଇଥିଲେ । ଯଦିଓ ଉଭୟ ଦଳର ବରିଷ୍ଠ ନେତାଙ୍କ ମଧ୍ୟରେ ଶେଷ ଆଲୋଚନା ଅସ୍ପଷ୍ଟ ରହିଥିଲା ତେବେ ଏହାର ଗୋଟିଏ ଦିନ ପରେ ଉଭୟ ଦଳ ପାକିସ୍ତାନ ମୁସଲିମ ଲିଗ୍ (ପିଏମଏଲ-ଏନ) ଏବଂ ପାକିସ୍ତାନ ପିପୁଲ୍ସ ପାର୍ଟି (ପିପିପି) କେନ୍ଦ୍ରରେ ଏକ ମିଳିତ ସରକାର ଗଠନ ପାଇଁ କ୍ଷମତା ବଣ୍ଟନ ଫର୍ମୁଲା ଘୋଷଣା କରିଛନ୍ତି ।
ଆସିଫ ଅଲି ଜରଦାରୀଙ୍କୁ ରାଷ୍ଟ୍ରପତି କରିବାର ସର୍ତ୍ତ
ସାମ୍ବାଦିକ ସମ୍ମିଳନୀରେ ଶାହାବାଜ ସରିଫଙ୍କ ନିକଟରେ ବସି ପିପିପି ଅଧ୍ୟକ୍ଷ ବିଲାୱାଲ ଭୁଟ୍ଟୋ କହିଛନ୍ତି ଯେ ଶାହାବାଜ ସରିଫ ଆମର ମିଳିତ ସରକାରର ପ୍ରଧାନମନ୍ତ୍ରୀ ପ୍ରାର୍ଥୀ ହେବେ । ଏହା ବ୍ୟତୀତ ବିଲାୱାଲ କହିଛନ୍ତି ଯେ ତାଙ୍କ ପିତା ଆସିଫ ଅଲି ଜରଦାରୀ ମିଳିତ ମଞ୍ଚର ରାଷ୍ଟ୍ରପତି ପ୍ରାର୍ଥୀ ହେବେ । ଶାହବାଜ ସରିଫ ଗଣମାଧ୍ୟମକୁ କହିଛନ୍ତି ଯେ ପିପିପି ବ୍ୟତୀତ ଅନେକ ଛୋଟ ଦଳ ମଧ୍ୟ ଆମର ମିଳିତ ସରକାରରେ ଅନ୍ତର୍ଭୁକ୍ତ । ସେ ଦାବି କରିଛନ୍ତି ଯେ ଏହି ମିଳିତ ସହଯୋଗରେ PML-N ମିଳିତ ମଞ୍ଚ ସହଜରେ ସରକାର ଗଠନ ପାଇଁ ସଂଖ୍ୟାଗରିଷ୍ଠତା ହାସଲ କରିବ । ମେଣ୍ଟର ସର୍ବବୃହତ ଦଳ PML-N ୭୯ ଟି ଆସନ ଥିବାବେଳେ ଏହି ମିଳିତ ଦଳର ଅନ୍ୟ ଦଳ ପିପିପି ୫୪ ଟି ଆସନ ପାଇଛି । ମିଳିତ ମଞ୍ଚ ପାଇଁ ଜରଦାରୀଙ୍କୁ ରାଷ୍ଟ୍ରପତି କରିବା ପାଇଁ ବିଲାୱାଲ ସର୍ତ୍ତ ରଖିଥିଲେ ।
ପିଟିଆଇ କହିଲା ‘ମାଣ୍ଡେଟ୍ ଚୋର’
ଉଭୟ ଦଳର ଘୋଷଣାକୁ ଜବାବ ଦେଇ ସୋସିଆଲ ମିଡିଆ ପ୍ଲାଟଫର୍ମ X ରେ ଥିବା ପିଟିଆଇ ଏହି ମେଣ୍ଟକୁ “ମାଣ୍ଡେଟ୍ ଚୋର” ବା ଜନାଦେଶ ଚୋର ବୋଲି କହିଛି । ଆପଣଙ୍କୁ କହିରଖୁଛୁ ଯେ ନିର୍ବାଚନରେ ପିଟିଆଇ ସମର୍ଥିତ ପ୍ରାର୍ଥୀମାନେ ସର୍ବାଧିକ ୯୩ ଟି ସିଟ୍ ଜିତିଛନ୍ତି । ଏହାର ସରକାର ଗଠନ ପାଇଁ ପାକିସ୍ତାନର ଛୋଟ ଦଳ ସହ ପିଟିଆଇ ମଧ୍ୟ ମେଣ୍ଟ ପାଇଁ ପ୍ରୟାସ ଚଳେଇଛି । ପିଟିଆଇ ନେତା ବାରିଷ୍ଟର ଗୋହର ଅଲି ଖାନ ସୋମବାର ଘୋଷଣା କରିଛନ୍ତି ଯେ ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) କେନ୍ଦ୍ର, ପଞ୍ଜାବ ଏବଂ ଖାଇବର ପାଖ୍ଟନଖୱା ପ୍ରଦେଶରେ ସରକାର ଗଠନ ପାଇଁ ସୁନ୍ନି ଇଟେହାଡ କାଉନସିଲ (ଏସଆଇସି) ସହିତ ଏକ ମେଣ୍ଟ ଗଠନ କରୁଛି ।
