ଅଁଳାକୁ ଆମେ ସମସ୍ତେ ଏକ ସୁପରଫୁଡ୍ ଭାବେ ମାନିଥାଉ ଏବଂ ଏପରି ମାନିବା ପଛରେ ଗୋଟିଏ କି ଦୁଇଟି ନୁହେଁ, ବରଂ ଅନେକ କାରଣ ରହିଛି । ଏଥିରେ ପ୍ରଚୁର ପରିମାଣରେ ଭିଟାମିନ୍ C ଏବଂ ଅନେକ ଆଣ୍ଟିଅକ୍ସିଡାଣ୍ଟ ରହିଛି । ଏହା ପାଚନ, ରୋଗପ୍ରତିରୋଧକ ଶକ୍ତି ଏବଂ ତ୍ୱଚା ପାଇଁ ମଧ୍ୟ ଉପକାରୀ ବୋଲି ମନେ କରାଯାଏ ।
ଲୋକମାନେ ଏହାକୁ ରସ, ଆଚାର, ଗୁଣ୍ଡ କିମ୍ବା ସପ୍ଲିମେଣ୍ଟ ଆକାରରେ ସହଜରେ ସେବନ କରନ୍ତି । କିନ୍ତୁ ଅଧିକାଂଶ ଲୋକ ଜାଣିନଥିବା ଏକ କଥା ହେଉଛି, ଅଁଳା ଖାଇବା ସମସ୍ତଙ୍କ ପାଇଁ ଲାଭଦାୟକ ନୁହେଁ । ହଁ, ଯଦିଓ ଏହା ସ୍ୱାସ୍ଥ୍ୟ ପାଇଁ ଭଲ, ତଥାପି କେତେକ ଲୋକଙ୍କ ଶରୀରରେ ଏହାର ବିପରୀତ ପ୍ରଭାବ ମଧ୍ୟ ପଡ଼ିପାରେ । କିଛି ଗବେଷଣା ଅନୁଯାୟୀ, ଅଁଳାରେ ଏପରି କେତେକ ପ୍ରାକୃତିକ ଉପାଦାନ ରହିଛି । ଯାହା ସମ୍ବେଦନଶୀଳ ବ୍ୟକ୍ତିଙ୍କଠାରେ ଆଲର୍ଜି, କୁଣ୍ଡାଇ ହେବା କିମ୍ବା ଫୁଲିଯିବା ଭଳି ସମସ୍ୟା ସୃଷ୍ଟି କରିପାରେ । ଏହା ବ୍ୟତୀତ, କେତେକ ନିର୍ଦ୍ଦିଷ୍ଟ ରୋଗରେ ପୀଡ଼ିତ ଲୋକମାନେ ଅଁଳା କରିବା ଦ୍ବାରା ସେମାନଙ୍କ ସ୍ୱାସ୍ଥ୍ୟାବସ୍ଥା ଆହୁରି ବିଗାଡ଼ି ଦେଇପାରେ । ତେବେ ଆସନ୍ତୁ ଜାଣିବା, କେଉଁ ଲୋକମାନଙ୍କ ପାଇଁ ଅଁଳା ଖାଇବା ଦ୍ବାରା ସ୍ୱାସ୍ଥ୍ୟ ସମସ୍ୟାକୁ ଆହୁରି ବଢ଼ାଇପାରେ ।
ଏସିଡିଟି ଏବଂ ହାଇପରଏସିଡିଟି ରୋଗୀ:
ଅଁଳା ପ୍ରକୃତିରେ ଅମ୍ଳୀୟ (acidic) ଅଟେ । ଯଦି ଆପଣ ପୂର୍ବରୁ ଏସିଡିଟି, ଗ୍ୟାଷ୍ଟ୍ରିକ୍ କିମ୍ବା ହାଇପରଏସିଡିଟି ସମସ୍ୟାରେ ପୀଡିତ ଅଛନ୍ତି, ତେବେ ଅଁଳାର ଅଧିକ ସେବନ ଆପଣଙ୍କ ସମସ୍ୟାକୁ ବଢ଼ାଇପାରେ । ଏହା ପେଟରେ ଜ୍ୱଳନ, ଖଟା ହାକୁଟି ଏବଂ ଛାତିରେ ଜ୍ୱଳନ ସୃଷ୍ଟି କରିପାରେ । ଯଦି ଆପଣ ଏହାକୁ ଖାଇବାକୁ ଚାହୁଁଛନ୍ତି, ତେବେ ବହୁତ କମ୍ ପରିମାଣରେ ଏବଂ ଖାଦ୍ୟ ସହିତ ଖାଆନ୍ତୁ ।
ନିମ୍ନ ରକ୍ତ ଶର୍କରା ଥିବା ଲୋକ:
ଅଁଳାରେ ଆଣ୍ଟି-ଡାଇବେଟିକ୍ ଗୁଣ ରହିଛି, ଯାହା ରକ୍ତ ଶର୍କରା ସ୍ତରକୁ ହ୍ରାସ କରିବାରେ ସାହାଯ୍ୟ କରିଥାଏ । ଏହା ମଧୁମେହ ରୋଗୀଙ୍କ ପାଇଁ ଭଲ, କିନ୍ତୁ ଯଦି ଆପଣ ପୂର୍ବରୁ ନିମ୍ନ ରକ୍ତ ଶର୍କରା ସମସ୍ୟାରେ ପୀଡିତ ଅଛନ୍ତି କିମ୍ବା ମଧୁମେହ ଔଷଧ ସେବନ କରୁଛନ୍ତି, ତେବେ ଅଁଳା ସେବନ ଆପଣଙ୍କ ରକ୍ତ ଶର୍କରାକୁ ଅତ୍ୟଧିକ କମାଇପାରେ, ଯାହା ଫଳରେ ମୁଣ୍ଡ ବୁଲାଇବା, ଦୁର୍ବଳତା ଏବଂ ବେହୋସ ହେବା ଭଳି ସମସ୍ୟା ହୋଇପାରେ ।
ରକ୍ତସ୍ରାବ ସମ୍ବନ୍ଧୀୟ ରୋଗ ଥିବା ଲୋକ:
ଅଁଳାରେ ଆଣ୍ଟି-ପ୍ଲେଟଲେଟ୍ ଗୁଣ ରହିଛି, ଯାହାର ଅର୍ଥ ହେଉଛି ଏହା ରକ୍ତ ଜମାଟ ବାନ୍ଧିବା ପ୍ରକ୍ରିୟାକୁ ଧୀର କରିପାରେ । ଯଦି ଆପଣ କୌଣସି ରକ୍ତସ୍ରାବ ସମ୍ବନ୍ଧୀୟ ରୋଗରେ ପୀଡିତ ଅଛନ୍ତି, ଯେପରିକି ହିମୋଫିଲିଆ, କିମ୍ବା ଯଦି ଆପଣ ରକ୍ତ ପତଳା କରୁଥିବା ଔଷଧ (ଯେପରିକି ୱାରଫାରିନ୍, ଆସ୍ପିରିନ୍) ସେବନ କରୁଛନ୍ତି, ତେବେ ଅଁଳା ସେବନ ରକ୍ତସ୍ରାବର ଆଶଙ୍କା ବଢ଼ାଇପାରେ । କୌଣସି ଅସ୍ତ୍ରୋପଚାର ପୂର୍ବରୁ ମଧ୍ୟ ଅଁଳା ସେବନ ବନ୍ଦ କରିଦେବା ଉଚିତ୍ ।
କିଡନୀ ଷ୍ଟୋନ୍ ଥିବା ଲୋକ:
ଅଁଳାରେ ଅକ୍ସାଲେଟ୍ ଥାଏ, ଯାହା କିଛି ଲୋକଙ୍କ କ୍ଷେତ୍ରରେ କିଡନୀ ଷ୍ଟୋନ୍ ଗଠନରେ ସହାୟକ ହୋଇପାରେ, ବିଶେଷକରି ଯଦି ସେମାନେ ଅକ୍ସାଲେଟ୍-ସେନ୍ସିଟିଭ୍ ଅଟନ୍ତି । ଯଦି ଆପଣଙ୍କୁ ପୂର୍ବରୁ କିଡନୀ ଷ୍ଟୋନ୍ ହୋଇଛି କିମ୍ବା ଆପଣ ଏହା ପ୍ରତି ସମ୍ବେଦନଶୀଳ ଅଛନ୍ତି, ତେବେ ଅଁଳାର ଅଧିକ ସେବନ କରିବା ପୂର୍ବରୁ ଡାକ୍ତରଙ୍କ ପରାମର୍ଶ ନେବା ଉଚିତ୍ । ପର୍ଯ୍ୟାପ୍ତ ପାଣି ପିଇବା ଏହି ବିପଦକୁ କମ୍ କରିବାରେ ସାହାଯ୍ୟ କରିପାରେ ।
ଗର୍ଭବତୀ ମହିଳା:
ଗର୍ଭାବସ୍ଥା ମହିଳାମାନେ ନିଜ ଖାଦ୍ୟ ବିଷୟରେ ଅଧିକ ସାବଧାନ ରହିବା ଉଚିତ୍ । ଯଦିଓ ଅଁଳା ସାଧାରଣତଃ ନିରାପଦ ବୋଲି ବିବେଚନା କରାଯାଏ, କିନ୍ତୁ ଏହାର ପ୍ରଭାବ ଉପରେ ସୀମିତ ଅଧ୍ୟୟନ ଉପଲବ୍ଧ । ତେଣୁ ଏହି ସମୟରେ ଅଁଳା ସେବନ କରିବା ପୂର୍ବରୁ ଜଣେ ଡାକ୍ତର କିମ୍ବା ବିଶେଷଜ୍ଞଙ୍କ ସହିତ ପରାମର୍ଶ କରିବା ଭଲ ।
ଥଣ୍ଡା ଏବଂ କାଶ ଥିବା ଲୋକ:
ଅଁଳା ପ୍ରକୃତିରେ ଶୀତଳ ଅଟେ । ଯଦି ଆପଣ ପୂର୍ବରୁ ଥଣ୍ଡା, କାଶ, ଫ୍ଲୁ କିମ୍ବା ଅନ୍ୟ କୌଣସି ଶ୍ୱାସକ୍ରିୟା ସମସ୍ୟାରେ ପୀଡିତ ଅଛନ୍ତି, ତେବେ ଅଁଳା ସେବନ ଆପଣଙ୍କ ସମସ୍ୟାକୁ ବଢ଼ାଇପାରେ କିମ୍ବା ଉପଶମ ହେବାରେ ବିଳମ୍ବ କରିପାରେ । ବିଶେଷକରି ରାତିରେ ଅଁଳା ସେବନ କରିବାଠାରୁ ଦୁରେଇ ରୁହନ୍ତୁ ।
ଶୁଷ୍କ ଚର୍ମ ଥିବା ଲୋକ:
ଅଁଳାରେ ଡାଇୟୁରେଟିକ୍ ଗୁଣ ଥାଏ । ଯାହା ଶରୀରରୁ ଅତ୍ୟଧିକ ଜଳ ବାହାର କରିବାରେ ସାହାଯ୍ୟ କରିଥାଏ । ଯଦି ଆପଣଙ୍କର ଚର୍ମ ଏବଂ କେଶ ଶୁଷ୍କ ଅଛି, ତେବେ ଅଁଳାର ଅଧିକ ସେବନ ଆପଣଙ୍କ ଶରୀରରେ ଜଳୀୟ ଅଂଶକୁ ଆହୁରି କମ୍ କରିପାରେ, ଯାହାଫଳରେ ଶୁଷ୍କତା ବଢ଼ିପାରେ । ଏହି କ୍ଷେତ୍ରରେ, ଅଁଳା ସେବନ ସହିତ ପର୍ଯ୍ୟାପ୍ତ ପାଣି ପିଇବା ଜରୁରୀ ।
ନିକଟରେ ଅସ୍ତ୍ରୋପଚାର ହୋଇଥିବା ଲୋକ:
ଯେଉଁମାନଙ୍କର ନିକଟରେ କୌଣସି ଅସ୍ତ୍ରୋପଚାର ହୋଇଛି, ସେମାନେ ଅଁଳା ସେବନରୁ ବିରତ ରହିବା ଉଚିତ୍ ।କାରଣ ଅଁଳା ରକ୍ତ ଜମାଟ ବାନ୍ଧିବା ପ୍ରକ୍ରିୟାକୁ ଧୀର କରିପାରେ, ଯାହା ଅସ୍ତ୍ରୋପଚାର ପରେ ରକ୍ତସ୍ରାବର ଆଶଙ୍କା ବଢ଼ାଇପାରେ । ଡାକ୍ତରଙ୍କ ପରାମର୍ଶ ନ ନେବା ପର୍ଯ୍ୟନ୍ତ ଏହାର ସେବନରୁ ଦୂରେଇ ରୁହନ୍ତୁ ।
ଯଦିଓ ଅଁଳା ଅନେକ ସ୍ୱାସ୍ଥ୍ୟ ଉପକାର ପ୍ରଦାନ କରେ, ତଥାପି ଏହାର ସେବନ କରିବା ପୂର୍ବରୁ ନିଜ ସ୍ୱାସ୍ଥ୍ୟ ଅବସ୍ଥାକୁ ବିଚାର କରିବା ଜରୁରୀ । ଯଦି ଆପଣ ଉପରୋକ୍ତ କୌଣସି ସମସ୍ୟାରେ ପୀଡିତ ଅଛନ୍ତି, ତେବେ ଅଁଳା ସେବନ କରିବା ପୂର୍ବରୁ ଜଣେ ଡାକ୍ତର କିମ୍ବା ଆୟୁର୍ବେଦ ବିଶେଷଜ୍ଞଙ୍କ ସହିତ ପରାମର୍ଶ କରିବା ସର୍ବଦା ଉତ୍ତମ ।
