ଘରେ ଟଙ୍କା ରହୁନି କି? ଯେତେ ରୋଜଗାର କଲେ ବି ମାସ ଶେଷକୁ ହାତ ଖାଲି! ତେବେ ବାସ୍ତୁଶାସ୍ତ୍ର ଅନୁସାରେ, ଆପଣଙ୍କ ଘରେ ଥିବା ଏକ ଛୋଟ ଗଛକୁ ଧନ ଓ ସମୃଦ୍ଧିର ପ୍ରତୀକ ବୋଲି ମନେ କରାଯାଏ । ଏହି ଗଛର ନାଁ ହେଉଛି ଜେଡ୍ ପ୍ଲାଣ୍ଟ। ମାନ୍ୟତା ରହିଛି ଯେ, ଏହାକୁ ଘରେ ରଖିଲେ ସକାରାତ୍ମକ ଶକ୍ତିର ସଞ୍ଚାର ହେବା ସହ ସୁଖ ଓ ସମୃଦ୍ଧି ବୃଦ୍ଧି ପାଏ। କିନ୍ତୁ ଏହି ଗଛକୁ ଲଗାଇବାର ସଠିକ୍ ଉପାୟ ଆପଣ ଜାଣିଛନ୍ତି କି?
ସନାତନ ପରମ୍ପରାରେ ମା’ ମହାଲକ୍ଷ୍ମୀଙ୍କୁ ଧନର ଦେବୀ ଏବଂ ଭଗବାନ କୁବେରଙ୍କୁ ଧନ ଓ ଐଶ୍ୱର୍ଯ୍ୟର ଦେବତା ଭାବେ ପୂଜା କରାଯାଏ । ସେହିପରି ବାସ୍ତୁଶାସ୍ତ୍ର ଓ ଫେଙ୍ଗ୍ଶୁଇରେ ଜେଡ୍ ପ୍ଲାଣ୍ଟକୁ ସୌଭାଗ୍ୟ ଓ ସମୃଦ୍ଧିର ପ୍ରତୀକ ବୋଲି ବିଶ୍ୱାସ କରାଯାଏ। ଏହି କାରଣରୁ ଅନେକ ଲୋକ ନିଜ ଘର, ଦୋକାନ ଓ ଅଫିସ୍ରେ ଏହି ଗଛ ଲଗାଇବାକୁ ପସନ୍ଦ କରନ୍ତି ।
ବଜାରରେ ଜେଡ୍ ପ୍ଲାଣ୍ଟ ନାଁରେ ବିଭିନ୍ନ ପ୍ରକାରର ଗଛ ମିଳିଥାଏ। ତେଣୁ ଗଛ କିଣିବା ପୂର୍ବରୁ ଏହାର ପତ୍ର ଓ ଗଠନକୁ ଭଲ ଭାବେ ଦେଖନ୍ତୁ । ପ୍ରକୃତ ଜେଡ୍ ପ୍ଲାଣ୍ଟର ପତ୍ର ସାଧାରଣତଃ ମୋଟା, ମାଂସଳ ଓ ଚିକ୍କଣ ହୋଇଥାଏ । ଏହାର ପତ୍ରରେ ପାଣି ସଞ୍ଚିତ ରହିପାରେ । ତେବେ କେବଳ ପତ୍ରର ଆକାର ଦେଖି ଅସଲି ଓ ନକଲି ଗଛ ଚିହ୍ନିବା ସବୁବେଳେ ସମ୍ଭବ ନୁହେଁ ।
ଜେଡ୍ ପ୍ଲାଣ୍ଟକୁ ବଢ଼ାଇବା ପାଇଁ ସବୁଠାରୁ ଜରୁରୀ ହେଉଛି ଭଲ ନିଷ୍କାସନ ବ୍ୟବସ୍ଥା ଥିବା ମାଟି । ଆପଣ ସାଧାରଣ ମାଟି ସହ ବାଲି କିମ୍ବା ପର୍ଲାଇଟ୍ ମିଶାଇ ଏକ ହାଲୁକା ମାଟି ପ୍ରସ୍ତୁତ କରିପାରିବେ। କୁଣ୍ଡିର ତଳେ ପାଣି ବାହାରିବା ପାଇଁ ଛିଦ୍ର ରହିବା ଜରୁରୀ । ଏହି ଗଛରେ ବାରମ୍ବାର ପାଣି ଦେବା ଆବଶ୍ୟକ ନାହିଁ । ମାଟି ଶୁଖିଗଲେ ହିଁ ପାଣି ଦିଅନ୍ତୁ। ଅଧିକ ପାଣି ଦେଲେ ଗଛର ଚେର ପଚିଯାଇପାରେ। ଜେଡ୍ ପ୍ଲାଣ୍ଟକୁ ଉଜ୍ଜ୍ୱଳ ଆଲୋକ ଓ ସକାଳର ହାଲୁକା ଖରା ମିଳୁଥିବା ସ୍ଥାନରେ ରଖିବା ଭଲ। ହଠାତ୍ ପ୍ରବଳ ଖରାରେ ରଖିଲେ ପତ୍ର ପୋଡ଼ିଯାଇପାରେ। ସେହିପରି ଅତ୍ୟଧିକ ଥଣ୍ଡାରୁ ମଧ୍ୟ ଗଛକୁ ସୁରକ୍ଷିତ ରଖନ୍ତୁ। ବାସ୍ତୁଶାସ୍ତ୍ର ଅନୁସାରେ, ଏହି ଗଛକୁ ଘରର ପ୍ରବେଶଦ୍ୱାର ପାଖରେ କିମ୍ବା ଆଲୋକ ଆସୁଥିବା ସ୍ଥାନରେ ରଖିବାକୁ ଅନେକେ ଶୁଭ ମନେ କରନ୍ତି। ତେବେ ଏହା ଧନ ବୃଦ୍ଧି କରେ ବୋଲି କୌଣସି ବୈଜ୍ଞାନିକ ପ୍ରମାଣ ନାହିଁ ।
ଆପଣଙ୍କ ଜେଡ୍ ପ୍ଲାଣ୍ଟ ବଡ଼ ହୋଇଗଲେ ଏହାର ଏକ ସୁସ୍ଥ ଡାଳକୁ କାଟି ନୂଆ ଗଛ ତିଆରି କରିପାରିବେ । ପ୍ରଥମେ କଟା ଡାଳକୁ କିଛି ସମୟ ଶୁଖିବାକୁ ଦିଅନ୍ତୁ। ତା’ପରେ ଏହାକୁ ହାଲୁକା ଓ ଶୁଖିଲା ମାଟିରେ ଲଗାନ୍ତୁ। ଉପଯୁକ୍ତ ଯତ୍ନ ନେଲେ କିଛି ଦିନ ପରେ ଏଥିରୁ ନୂଆ ଗଛ ବଢ଼ିପାରିବ । ତେବେ ମନେ ରଖନ୍ତୁ, ଜେଡ୍ ପ୍ଲାଣ୍ଟକୁ ସୌଭାଗ୍ୟ ଓ ସମୃଦ୍ଧିର ପ୍ରତୀକ ଭାବେ ଦେଖାଯାଏ। କିନ୍ତୁ ଘରର ଆର୍ଥିକ ସ୍ଥିତି ସୁଧାରିବା ପାଇଁ ନିୟମିତ ସଞ୍ଚୟ, ଠିକ୍ ଯୋଜନା ଓ ପରିଶ୍ରମ ମଧ୍ୟ ଜରୁରୀ ।
