ଆୟୁର୍ବେଦରେ ଅନେକ ପ୍ରକାରର ପତ୍ରକୁ ଔଷଧ ପ୍ରସ୍ତୁତ କରିବା ପାଇଁ ବ୍ୟବହୃତ ହୁଏ। ଏଥିମଧ୍ୟରୁ ଏକ ପତ୍ର ହେଉଛି ଅମରପୋଇ। ଏହାର ପତ୍ର ଶରୀର ପାଇଁ ବହୁତ ସ୍ବତନ୍ତ୍ର। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଏହା ଔଷଧୀୟ ଗୁଣରେ ଭରପୂର ଏବଂ ଅନେକ ସ୍ବାସ୍ଥ୍ୟ ସମସ୍ୟା ଦୂର କରିବାରେ ପ୍ରଭାବଶାଳୀ ଅଟେ। ମୁଖ୍ୟତଃ ଅମରପୋଇ କିଡ୍ନୀ ଷ୍ଟୋନ୍ ପାଇଁ ବହୁତ ଲାଭଦାୟକ।
ଏହି ପତ୍ରର ରସ ନିୟମିତ ପିଇବା ଦ୍ୱାରା ଷ୍ଟୋନ୍ ବା ପଥରଗୁଡ଼ିକ ମିଳାଇ ଯାଇ ପରିସ୍ରା ମାଧ୍ୟମରେ ବାହାରକୁ ବାହାରିଯାଏ। ଏହା ବ୍ୟତୀତ ଏହା କିଡ୍ନୀକୁ ବିଷମୁକ୍ତ କରିଥାଏ ଏବଂ ପୁନର୍ବାର ଷ୍ଟୋନ୍ ହେବାକୁ ରୋକିଥାଏ।
ଏହି ପତ୍ରରେ ଅନେକ ଉପାଦାନ ରହିଛି, ଯାହା ଶରୀରର ଯେକୌଣସି ଅଂଶରେ ପ୍ରଦାହ ହ୍ରାସ କରିବାରେ ସାହାଯ୍ୟ କରେ। ଏହାର ପତ୍ର ଗଣ୍ଠି ଯନ୍ତ୍ରଣା, ଆଘାତ କିମ୍ବା ଆଭ୍ୟନ୍ତରୀଣ ପ୍ରଦାହ ଭଳି ପରିସ୍ଥିତିରେ ବହୁତ ଲାଭଦାୟକ ହୋଇଥାଏ ବୋଲି ଆୟୁର୍ବେଦ ଶାସ୍ତ୍ରରେ ଉଲ୍ଲେଖ ରହିଛି।
ଅମରପୋଇ ପତ୍ରକୁ ବାଟି ଏହାର ପେଷ୍ଟ ଲଗାଇବା ଦ୍ୱାରା କଟା, କ୍ଷତ, ପୋଡ଼ା କିମ୍ବା ଫୁଟାରୁ ମୁକ୍ତି ମିଳିଥାଏ। ପ୍ରକୃତରେ, ଏଥିରେ ଆଣ୍ଟିବ୍ୟାକ୍ଟେରିଆଲ ଗୁଣ ଅଛି, ଯାହା କ୍ଷତକୁ ଶୀଘ୍ର ସୁସ୍ଥ କରିବାରେ ଏବଂ ସଂକ୍ରମଣରୁ ରକ୍ଷା କରିବାରେ ସହାୟକ ହୋଇଥାଏ।
ଏହି ପତ୍ରର କାଢ଼ା ପ୍ରସ୍ତୁତ କରି ନିୟମିତ ପିଇଲେ ଶ୍ୱାସରୋଗ, କାଶ ଏବଂ କଫ ଭଳି ସମସ୍ୟାରୁ ମୁକ୍ତି ମିଳିଥାଏ। ଏହା କଫକୁ ପତଳା କରେ ଏବଂ ଗଳା ଯନ୍ତ୍ରଣାକୁ ଆରାମ ଦେବାରେ ମଧ୍ୟ ପ୍ରଭାବଶାଳୀ ହୋଇଥାଏ।
ଏହା ହାଲୁକା ଏବଂ ପାଚନ ଗୁଣର ଏକ ଭଣ୍ଡାର। ପେଟ ଗ୍ୟାସ, ବଦହଜମୀ ଏବଂ ଏସିଡିଟି ଭଳି ସମସ୍ୟାରେ ଏହାର ସେବନ ଲାଭଦାୟକ ହୋଇପାରେ। ଏହା ବ୍ୟତୀତ ଏହା ଲିଭର ବା ଯକୃତକୁ ଶକ୍ତିଶାଳୀ କରିବାରେ ମଧ୍ୟ ପ୍ରଭାବଶାଳୀ ପ୍ରମାଣିତ ହୋଇପାରେ।
ଏହାର ୧-୨ଟି ପତ୍ରକୁ ଭଲ ଭାବରେ ଧୋଇ ସକାଳେ ଖାଲି ପେଟରେ ଚୋବାଇ ଖାଇପାରିବେ। ଏହା ବ୍ୟତୀତ, ଆପଣ ପତ୍ରରୁ ରସ ବାହାର କରି ମଧ୍ୟ ପିଇପାରିବେ। ତଥାପି ମନେରଖନ୍ତୁ ଯେ ଗର୍ଭବତୀ ମହିଳାମାନଙ୍କ ପାଇଁ ଏହାର ସେବନ ଉପଯୁକ୍ତ ବୋଲି ବିବେଚନା କରାଯାଏ ନାହିଁ। ଏପରି ପରିସ୍ଥିତିରେ, କେବଳ ଡାକ୍ତରଙ୍କ ପରାମର୍ଶରେ ନିଅନ୍ତୁ।
