ଭାରତୀୟ ରୋଷେଇଘରରେ ଅଦା ଏକ ପରିଚିତ ମସଲା । ଚା’, ତରକାରୀ କିମ୍ବା ଘରୋଇ ଉପଚାର ବିଭିନ୍ନ ଭାବରେ ଏହାକୁ ବ୍ୟବହାର କରାଯାଏ। ଅଦାରେ ଥିବା ଜିଞ୍ଜେରଲ୍ ଭଳି ଜୈବ ସକ୍ରିୟ ଉପାଦାନ ଯୋଗୁଁ ଏହା ଶରୀରରେ ଆଣ୍ଟି-ଇନ୍ଫ୍ଲାମେଟୋରି ଓ ଆଣ୍ଟି ଅକ୍ସସିଡାଣ୍ଟ ପ୍ରଭାବ ପକାଇପାରେ। ବିଭିନ୍ନ ଅଧ୍ୟୟନର ସମୀକ୍ଷାରେ ଅଦାର କିଛି ସ୍ୱାସ୍ଥ୍ୟ ଲାଭ ପାଇଁ ପ୍ରମାଣ ମିଳିଛି, ଯଦିଓ ସବୁ କ୍ଷେତ୍ରରେ ପ୍ରମାଣ ସମାନ ପ୍ରଭାବଶାଳୀ ନୁହେଁ। ପ୍ରତିଦିନ ଅଦା ଖାଇବାର ଏକ ମୁଖ୍ୟ ସମ୍ଭାବ୍ୟ ଲାଭ ହେଉଛି ହଜମ ପ୍ରକ୍ରିୟାକୁ ସଶକ୍ତ କରିଥାଏ ଓ ବାନ୍ତି ଭାବରେ ସହାୟତା କରିଥାଏ। ବିଶେଷକରି ଗର୍ଭାବସ୍ଥାରେ ହେଉଥିବା ବାନ୍ତି ଭାବ କମାଇବାରେ ଅଦାର ତୁଳନାମୂଳକ ଭଲ ପ୍ରମାଣ ରହିଛି। କିଛି କ୍ଲିନିକାଲ୍ ଅଧ୍ୟୟନରେ ଜଣାପଡିଛି ଯେ, ଅଦା ଖାଇବା ଦ୍ୱାରା କଣ୍ଠ ସଫା ରହିବା ସହ ମନ ହାଲୁକା ଲାଗିଥାଏ।
ଅଦାରେ ଥିବା ସକ୍ରିୟ ଉପାଦାନ ଶରୀରର ପ୍ରଦାହ ଓ ଅକ୍ସିଡେଟିଭ୍ ଷ୍ଟ୍ରେସ୍ ସହ ଜଡ଼ିତ କିଛି ସୂଚକକୁ ପ୍ରଭାବିତ କରିପାରେ। ଏହା ସହିତ ଅଦା ସେବନ ଦ୍ବାରା ରକ୍ତରେ ଶର୍କରା ନିୟନ୍ତ୍ରଣ ମଧ୍ୟରେ ସମ୍ଭାବ୍ୟ ସମ୍ପର୍କ ନେଇ ଗବେଷଣା ହୋଇଛି। ତେବେ ଏହି ଫଳାଫଳକୁ ଦେଖି ଅଦାକୁ ମଧୁମେହ କିମ୍ବା ଅନ୍ୟ କୌଣସି ରୋଗର ଔଷଧର ବିକଳ୍ପ ଭାବେ ନେବା ଠିକ୍ ନୁହେଁ। କିଛି ଗବେଷଣାରେ ଅଦାର ସେବନ ଓ ମେଟାବଲିକ୍ ସ୍ୱାସ୍ଥ୍ୟ ସହିତ ଜଡ଼ିତ ସମ୍ଭାବ୍ୟ ଲାଭ ମଧ୍ୟ ଦେଖାଯାଇଛି। ଏକ ବଡ଼ ସମୀକ୍ଷାରେ ଅଷ୍ଟିଓଆର୍ଥ୍ରାଇଟିସ୍ର ବେଦନା କମାଇବାରେ ଅଦା ପାଇଁ ଭଲ ପ୍ରମାଣ ମିଳିଥିବାବେଳେ, ଓଜନ ଓ ରକ୍ତଚାପ ଭଳି କ୍ଷେତ୍ରରେ ପ୍ରମାଣର ନିଶ୍ଚିତତା ତୁଳନାମୂଳକ କମ୍ ରହିଛି। ତେଣୁ ମାତ୍ର ଅଦା ଖାଇଲେ ଓଜନ କମିବ କିମ୍ବା ରକ୍ତଚାପ ନିୟନ୍ତ୍ରଣ ହୋଇଯିବ ବୋଲି ଧରିନେବା ଉଚିତ ନୁହେଁ।
ତେବେ ଅଦାକୁ ଅତ୍ୟଧିକ ପରିମାଣରେ ଖାଇବା ମଧ୍ୟ ଠିକ୍ ନୁହେଁ। କେତେକ ଲୋକଙ୍କଠାରେ ଅଧିକ ଅଦା ସେବନରେ ଛାତିଜ୍ୱଳା, ଏସିଡିଟି, ପେଟ ଅସୁବିଧା କିମ୍ବା ଡାଇରିଆ ଭଳି ସାମାନ୍ୟ ପାର୍ଶ୍ୱପ୍ରତିକ୍ରିୟା ହୋଇପାରେ। ଅଦାର ସପ୍ଲିମେଣ୍ଟ ନେଉଥିବା ବ୍ୟକ୍ତି, ବିଶେଷକରି ନିୟମିତ ଔଷଧ ଖାଉଥିଲେ, ଡାକ୍ତରଙ୍କ ପରାମର୍ଶ ନେବା ଭଲ। ମାସେ ଧରି ନିୟମିତ ଓ ମାପଯୋଗ୍ୟ ପରିମାଣରେ ଅଦା ଖାଇବା ଏକ ସୁସ୍ଥ ଖାଦ୍ୟାଭ୍ୟାସର ଅଂଶ ହୋଇପାରେ। ଏହା ହଜମ ଓ ବାନ୍ତି ଭଳି କିଛି ସମସ୍ୟାରେ ସହାୟକ ହୋଇପାରେ ଏବଂ ଏହାର ଆଣ୍ଟିଅକ୍ସିଡାଣ୍ଟ ଓ ଆଣ୍ଟି-ଇନ୍ଫ୍ଲାମେଟୋରି ଗୁଣ ନେଇ ଗବେଷଣା ଜାରି ରହିଛି। କିନ୍ତୁ ଅଦାକୁ କୌଣସି ରୋଗର ଚିକିତ୍ସା ବା ଔଷଧର ବିକଳ୍ପ ଭାବେ ବ୍ୟବହାର କରିବା ଉଚିତ ନୁହେଁ।
