ଗଞ୍ଜାମ : ପୁଅ ଡାକିଲା, ମୋବାଇଲ ଟାୱାର ଉପରୁ ଓହ୍ଲାଇ ଆସିଲେ ବାପା । ଚରମ ନିଷ୍ପତ୍ତିରୁ ଓହରିଲେ । ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ ତଣ୍ଡିପୁର ଗାଁରେ ଘଟିଛି ଏହି ଘଟଣା । ଘରୋଇ କଳହରୁ ତଣ୍ଡିପୁରର ମଙ୍ଗଳା ନାଇକ ଗତକାଲି ରାତିରେ ଗାଁରେ ଥିବା ମୋବାଇଲ ଟାୱାର ଉପରକୁ ଚଢି ଯାଇଥିଲେ । ଡର ଥିଲା କାଳେ ତଳକୁ ଡେଇଁ ଜୀବନ ହାରିଦେବେ । ଏନେଇ ସ୍ଥାନୀୟ ଲୋକେ ପୋଲିସକୁ ସୂଚନା ଦେଇଥିଲେ ।
ଜରଡ଼ା ଥାନା ପୋଲିସ ଟିମ୍ ସହିତ ଅଗ୍ନିଶମ ବିଭାଗର ଟିମ୍ ପହଞ୍ଚି ମଙ୍ଗଳାଙ୍କୁ ଟାୱାରରୁ ଓହ୍ଲାଇବା ଉଦ୍ୟମ କରିଥିଲେ । ହେଲେ ସଫଳ ହୋଇନଥିଲେ । ରାତି ସାତରୁ ରାତି ବାର ଘଣ୍ଟା ପର୍ଯ୍ୟନ୍ତ ଗାଁରେ ଟାୱାର ନିକଟରେ ଜମିଥିଲା ଭିଡ଼ । ଏହି ସମୟରେ ଟାୱାର ପାଖକୁ ଆସି ବାପା ମଙ୍ଗଳା ନାଇକଙ୍କ ଡାକିଥିଲା ପୁଅ । ତଳକୁ ଓହ୍ଲାଇବା ଆସିବାକୁ କହିଥିଲା । ଆଉ ପୁଅର ସ୍ନେହ ବୋଳା ଡାକରେ ବାପା ମଙ୍ଗଳା ରାତି ୧୨ଟାରେ ମୋବାଇଲ ଟାୱାରରୁ ତଳକୁ ଓହ୍ଲାଇଥିଲେ । ଏହା ପରେ ତାଙ୍କୁ ଚିକିତ୍ସା ପାଇଁ ପାତ୍ରପୁର ମେଡିକାଲରେ ଭର୍ତ୍ତି କରାଯାଇଛି ।
