ଉଦଳା : ଡାକ୍ତରଙ୍କ ଘରକୁ ଟାର୍ଗେଟ କରିଲେ ଲୁଟେରା । ଲୁଟିନେଲେ ଘରୁ ୧୫ଲକ୍ଷରୁ ଉର୍ଦ୍ଧ ଟଙ୍କାର ସୁନା ଅଳଙ୍କାର ସହିତ ନଗଦ ଦେଢ଼ଲକ୍ଷ ଟଙ୍କା । ଖୁଣ୍ଟାଥାନା ସାଇଁକୁଳା ଗାଁରେ ଘଟିଛି ଏଭଳି ଅଭାବନୀୟ ଘଟଣା । ଚନ୍ଦନ ଯାତ୍ରା ଦେଖିବାକୁ ଯିବା ପଡିଲା ମହଙ୍ଗା । ବାଲେଶ୍ୱରରେ ଡାକ୍ତର ଥିବା ଅଭିନ୍ନ କୁମାର ସାହୁଙ୍କ ପରିବାର ଲୋକେ ଗତକାଲି ଚନ୍ଦନ ଦେଖିବା ନିମନ୍ତେ ବାଲେଶ୍ୱର ଯାଇଥିଲେ । ଘରେ ପରିବାର ଲୋକଙ୍କ ଅନୁପସ୍ଥିତି ଜାଣି ଲୁଟେରା ମାନେ ବିଳମ୍ବିତ ରାତିରେ ପଶି ଗଡ଼ରେଜ ଭାଙ୍ଗି ସେଥିରେ ଥିବା ୧୫ଲକ୍ଷରୁ ଉର୍ଦ୍ଧ ଟଙ୍କାର ସୁନା ଅଳଙ୍କାର ସହିତ ନଗଦ ଦେଢ଼ ଲକ୍ଷରୁ ଉର୍ଦ୍ଧ ଟଙ୍କା ଲୁଟି ନେଇଛନ୍ତି ।
ଆଜି ମଧ୍ୟାହ୍ନରେ ଜନଗଣନା ନିମନ୍ତେ ଅଧିକାରୀ ଆସିଥିବା ବେଳେ ଘର ମୁଖ୍ୟ ଫାଟକରେ ତାଲା ଏବଂ ଭିତର କବାଟ ଖୋଲାଥିବା ଦେଖି ପଡୋଶୀଙ୍କୁ ପଚାରିଥିଲେ । ଯାହାପରେ ପଡୋଶୀଙ୍କର ସନ୍ଦେହ ହେବାରୁ ସେମାନେ ପରିବାର ଲୋକଙ୍କୁ ଅବଗତ କରାଇଥିଲେ । ପରିବାର ଲୋକେ ଆସି ପହଞ୍ଚିବା ପରେ ଘରୁ ଲୁଟ ହୋଇଥିବା ଜାଣି ପାରି ଏନେଇ ପୋଲିସକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
