ନୋଏଡ଼ା : ନୋଏଡା ମମୁରା ଗାଁରେ ଏକ ବହୁ ମହଲା ବିଲିଡିଂରେ ଭୟଙ୍କର ଅଗ୍ନିକାଣ୍ଡ । ନିଆଁ ଲାଗିବା ବିଲିଡିଂ ଭିତରେ ୪୮ ପରିବାରର ଲୋକ ରହୁଥିଲେ । ସମସ୍ତଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ ଘଟଣାରେ ୨ ଜଣଙ୍କ ଜୀବନ ଚାଲିଯାଇଥିଲା । ଅଗ୍ନିଶମ ଟିମ୍ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା ।
ଖବର ମୁତାବକ, ଫେଜ-୩ ଥାନା ଅନ୍ତର୍ଗତ ମମୁରାରେ ଏକ ବିଲିଡିଂରେ ରଖାଯାଇଥିବା ଇଲେକ୍ଟ୍ରିକ ବାଇକରେ ନିଆଁ ଲାଗିଯାଇଥିଲା । ସ୍ପାର୍କିଂ ହେବା ଯୋଗୁଁ ନିଆଁ ଚାହୁଁ ଚାହୁଁ ପୁରା ବିଲିଡିଂରେ ଲାଗିଯାଇଥିଲା । ପାର୍କିଂରେ ଲାଗିଥିବା ନିଆଁ ବିଲିଡିଂ ସାରା ବ୍ୟାପିଯାଇଥିଲା । ନିଆଁ ଧୂଆଁ ଦେଖି ବିଲିଡିଂରେ ଥିବା ଲୋକମାନେ ଚିତ୍କାର କରିଥିଲେ । ଭିତରେ ଫସିଥିବା ପରିବାରକୁ ଉଦ୍ଧାର କରିବା ପାଇଁ ଅଗ୍ନିଶମ ଟିମ୍ ପୁରା ଚେଷ୍ଟା କରିଥିଲା ।
ନୋଏଡା ପୋଲିସ କହିବା ମୁତାବକ, ବିଲିଡିଂ ଜି-୪ ଗ୍ରାଉଣ୍ଡ ଫ୍ଲୋରରେ ଇଲେକ୍ଟ୍ରି ବାଇକ୍ ଚାର୍ଜରେ ବସିଥିଲା । ଏହି ସମୟରେ ସ୍ପାର୍କିଂ ହୋଇ ଆଖପାଖରେ ଥିବା ପେଟ୍ରୋଲ ଗାଡ଼ିରେ ନିଆଁ ଲାଗିଥିଲା । ଖବର ବିଷୟରେ ସୂଚନା ମିଳିବା ପରେ ଫାୟାର ସର୍ଭିସ ୟୁନିଟ୍ ୭ ଫାୟାର ଟେଣ୍ଡର, ହାଇଡ୍ରୋଲିକ୍ ପ୍ଲାଟଫର୍ମ ସ୍ଥାନୀୟ ପୋଲିସ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା ।
ପୋଲିସ କହିବା ମୁତାବକ, ଏହି ବିଲିଡିଂରେ ୫୦ ପରିବାର ରହୁଥିଲେ । ସେମାନଙ୍କୁ ଉଦ୍ଧାର କରାଯାଇଥିଲା । ଧୂଆଁ ଯୋଗୁଁ ୨ ଜଣଙ୍କ ଜୀବନ ମଧ୍ୟ ଚାଲିଯାଇଛି । ତେବେ ଅଗ୍ନିଶମ ଟିମ୍ କଠିନ ପରିଶ୍ରମ କରିବା ପରେ ନିଆଁକୁ ଆୟତ୍ତ କରିଛି । ଏହାସହିତ ମାମଲାରେ ଘର ମାଲିକକୁ ଗିରଫ କରାଯାଇଛି ।
