ସୁବର୍ଣ୍ଣପୁର: ସ୍କୁଲ ପରିସରରେ ନବମ ଶ୍ରେଣୀ ଛାତ୍ରଙ୍କୁ ନିସ୍ତୁକ ମାଡ଼ । ବିଧା, ଗୋଇଠା ସହ ଚାପୁଡା । ସୋସିଆଲ ମିଡିଆରେ ଭାଇରାଲ ଭିଡିଓ । ସୁବର୍ଣ୍ଣପୁର ଜିଲ୍ଲାର ବିଦ୍ୟାଳୟରୁ ଆସିଛି ଅମାନବୀୟ ଭିଡିଓ । ଜଣେ ନବମ ଶ୍ରେଣୀ ଛାତ୍ରକୁ ତାର ତିନିଜଣ ସହପାଠୀ ଏବଂ ବାହାରୁ ଦୁଇ ଛାତ୍ର ନିସ୍ତୁକ ମାଡ଼ ମାରୁଛନ୍ତି ।
ଜଣଙ୍କୁ ଘେରି ପିଟୁଛନ୍ତି ୪ରୁ ୫ ଜଣ । ଆଉ ସେହି ଦୃଶ୍ୟକୁ ଅନ୍ୟ ଜଣେ ଛାତ୍ର ମୋବାଇଲରେ ଭିଡିଓ କରୁଛି । ଏହା ପରେ ଭିଡିଓକୁ ଇନଷ୍ଟ୍ରଗ୍ରାମରେ ଅପଲୋଡ଼ ମଧ୍ୟ କରିଛନ୍ତି । କେବଳ ସେତିକି ନୁହେଁ ଭଡିଓ ଅପଲୋଡ କରିବା ସହ ଇନଷ୍ଟଗ୍ରାମରେ ଖୁଲମଖୁଲା ଧମକ ମଧ୍ୟ ଦେଇଛନ୍ତି ‘ଏଥର ବଞ୍ଚିଗଲୁ ଆର ଥରକୁ ନୁହେଁ ’ । ଭିଡିଓ ଭାଇରାଲ ହେବା ପରେ ପୀଡିତ ଛାତ୍ରଙ୍କ ବାପା ଉଲୁଣ୍ଡା ଥାନାରେ ଏକ ମାମଲା ରୁଜୁ କରିଛନ୍ତି । ଅଭିଯୁକ୍ତ ଛାତ୍ରମାନଙ୍କୁ ଥାନାକୁ ଆଣି ପଚରା ଉଚୁରା କରୁଛି ପୋଲିସ । ଅନ୍ୟପଟେ ହାଇସ୍କୁଲ ପ୍ରଧାନ ଶିକ୍ଷୟିତ୍ରୀ କିମ୍ବା ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ l ତେବେ ଖୁବ ଶୀଘ୍ର ଦୋଷୀ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଏସ୍ ପି ।
