ଆମେରିକାର H-1B ଭିସାର ପ୍ରାୟ ୭୦ ପ୍ରତିଶତ ଭାରତୀୟ କର୍ମଚାରୀ ବ୍ୟବହାର କରୁଥିବାରୁ ସେମାନେ ସବୁଠୁ ଅଧିକ ପ୍ରଭାବିତ ହୋଇଛନ୍ତି । ଆମେରିକାର ସାମ୍ପ୍ରତିକ ଇମିଗ୍ରେସନ ନିୟମ ଅନୁଯାୟୀ, H-1B ଭିସାଧାରୀଙ୍କ ଚାକିରି ଚାଲିଗଲେ ସେମାନଙ୍କୁ ଆଇନ ଗତ ଭାବେ ରହିବା ପାଇଁ ମାତ୍ର ୬୦ ଦିନର ଗ୍ରେସ ପିରିୟଡ଼ ମିଳିଥାଏ । ଯଦି ଏହି ସମୟରେ କୌଣସି ନୂଆ କମ୍ପାନୀ ସେମାନଙ୍କ ଭିସା ସ୍ପନ୍ସର ନକରେ ତେବେ ବାଧ୍ୟ ହୋଇ ସେମାନଙ୍କୁ ଦେଶ ଛାଡ଼ିବାକୁ ପଡ଼ିବ ।
ଭାରତୀୟ କର୍ମଚାରୀମାନେ ଭବିଷ୍ୟତକୁ ନେଇ ଚିନ୍ତିତ ହୋଇପଡିଛନ୍ତି । ଏବେ ଆମେରିକାରେ ମାନ୍ଦାବସ୍ଥା ଚାଲିଥିବାରୁ ଏହି ୬୦ଦିନି ସମୟ ମଧ୍ୟରେ ନୂଆ ଚାକିରି ମିଳିବା ସହଜ ହେଉନାହିଁ । ନିଜର ଆଇନଗତ ସ୍ଥିତି ବଜାୟ ରଖିବା ପାଇଁ ଅନେକ ଭାରତୀୟ H-1B ରୁ B-1/B-2 ପର୍ଯ୍ୟଟକ ଭିସାକୁ ପରିବର୍ତ୍ତନ କରିବାକୁ ଆବେଦନ କରୁଛନ୍ତି । ମାତ୍ର ଆମେରିକା ଇମିଗ୍ରେସନ ବିଭାଗ ପକ୍ଷରୁ ଏହି ଆବେଦନ ଗୁଡ଼ିକର କଡ଼ା ଯାଞ୍ଚ କରାଯାଉଛି ।
