ଜିଲ୍ଲାପାଳଙ୍କୁ ଲାଞ୍ଚଦେବା ଉଦ୍ୟମ: ଆମ୍ବୁଜା ସିମେଣ୍ଟ ଉତ୍ପାଦନ ଅଧିକାରୀ ଗିରଫ

ବରଗଡ଼: ଜିଲ୍ଲାପାଳଙ୍କୁ ଲାଞ୍ଚଦେବାକୁ ଉଦ୍ୟମ କରୁଥିବା ଅଭିଯୋଗରେ ଆମ୍ବୁଜା ସିମେଣ୍ଟର ମୁଖ୍ୟ ଉତ୍ପାଦନ ଅଧିକାରୀ ଗିରଫ ହୋଇଛନ୍ତି। ବରଗଡ଼ ଜିଲ୍ଲାପାଳ ଆଇଏଏସ୍ ଆଦିତ୍ୟ ଗୋୟଲଙ୍କୁ ସାକ୍ଷାତ୍ କରିବାକୁ ଆସି ଅଧିକାରୀ ଜଣକ ୨ ଲକ୍ଷ ଟଙ୍କା ଫୁଲତୋଡା ଏବଂ ମିଠା ପ୍ୟାକେଟ ପ୍ରଦାନ କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ତାଙ୍କୁ ଅଟକ ରଖାଯାଇ ଭିଜିଲାନ୍ସ କର୍ତ୍ତୃପକ୍ଷଙ୍କୁ ସୂଚନା ଦିଆଯାଇଥିଲା। ସୂଚନା ପାଇବା ପରେ ଭିଜିଲାନ୍ସ ଦଳ ସେଠାରେ ପହଞ୍ଚି ୨ ଲକ୍ଷ ଟଙ୍କା ନଗଦ ଥିବା ପ୍ୟାକେଟକୁ ଜବତ କରିଥିଲେ। ତାଙ୍କ ପରିଚୟ ଛତିଶଗଡର ଅମ୍ବୁଜା ସିମେଣ୍ଟର ମୁଖ୍ୟ ଉତ୍ପାଦନ ଅଧିକାରୀ (ପୂର୍ବ) ରାମଭବ ଗାଟୁ ବୋଲି ଜଣାପଡିଛି। ଏହି ଅଭିଯୋଗ ଆଧାରରେ, ସମ୍ବଲପୁର ଭିଜିଲାନ୍ସ ପକ୍ଷରୁ ଏକ ମାମଲା ରୁଜୁ କରାଯାଇଛି। ଅଭିଯୁକ୍ତକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି।