କାର୍ ଚଲାଇବା ସମୟରେ ଲୋକମାନେ ପ୍ରାୟତଃ ଇଞ୍ଜିନ, ବ୍ରେକ୍ ଏବଂ ମାଇଲେଜ୍ ଉପରେ ଅଧିକ ଧ୍ୟାନ ଦେଇଥାନ୍ତି। କିନ୍ତୁ ଅନେକ ସମୟରେ ଏକ ଛୋଟ ବୈଷୟିକ ତ୍ରୁଟି ମଧ୍ୟ ବଡ଼ ବିପଦର କାରଣ ପାଲଟିପାରେ। ସେହିଭଳି ଏକ ସମସ୍ୟା ହେଉଛି କାର୍ର ଡୋର ଲକ୍ ଜାମ୍ ବା ଖରାପ ହୋଇଯିବା। ପ୍ରବଳ ଗରମ, ଦୁର୍ଘଟଣା, ଇଲେକ୍ଟ୍ରିକ୍ ତ୍ରୁଟି କିମ୍ବା ଲକ୍ ସିଷ୍ଟମ୍ ଫେଲ୍ ହେବା ଯୋଗୁଁ ଅନେକ ସମୟରେ କାର୍ ଡୋର୍ ହଠାତ୍ କାମ କରିବା ବନ୍ଦ କରିଦିଏ। ଏଭଳି ପରିସ୍ଥିତିରେ ଲୋକମାନେ ଭୟଭୀତ ହୋଇଯାଆନ୍ତି ଏବଂ କଣ କରିବେ କିଛି ବୁଝିପାରନ୍ତି ନାହିଁ।
ବିଶେଷ କରି ଯଦି କାର୍ଟି ଭିତର ପଟୁ ଲକ୍ ହୋଇଯାଏ, ତେବେ ସ୍ଥିତି ଆହୁରି ସଂଗୀନ ଓ ବିପଜ୍ଜନକ ହୋଇପଡ଼େ। ତେବେ କହିରଖୁଛୁ ଯେ, ଏଭଳି ଜରୁରୀକାଳୀନ ପରିସ୍ଥିତିରେ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ନିଜକୁ ଶାନ୍ତ ରଖିବା। ଯଦି ସଠିକ୍ ଉପାୟ ଜଣାଥାଏ, ତେବେ ବିନା କୌଣସି ଭୟରେ ସୁରକ୍ଷିତ ଭାବେ ବାହାରକୁ ବାହାରି ହେବ। ଏହି କାରଣରୁ ଏବେ ପ୍ରତ୍ୟେକ ଚାଳକ କାର୍ର ଇମରଜେନ୍ସି ଏଗଜିଟ୍ ଏବଂ ସେଫ୍ଟି ଟ୍ରିକ୍ସ ବିଷୟରେ ଜାଣିବା ଅତ୍ୟନ୍ତ ଜରୁରୀ ବୋଲି ବିବେଚନା କରାଯାଉଛି।
ଡୋର ଲକ୍ ଜାମ୍ ହେଲେ ପ୍ରଥମେ କରନ୍ତୁ ଏହି କାମ
ଯଦି କାର୍ର ଡୋର ଲକ୍ ହଠାତ୍ କାମ କରିବା ବନ୍ଦ କରିଦିଏ, ତେବେ ସର୍ବପ୍ରଥମେ ଆଦୌ ବ୍ୟସ୍ତ ହୁଅନ୍ତୁ ନାହିଁ। ଅନେକ ସମୟରେ ଇଲେକ୍ଟ୍ରୋନିକ୍ ଲକ୍ ସିଷ୍ଟମ୍ ଫ୍ରିଜ୍ ହୋଇଯାଏ, ଏଭଳି ପରିସ୍ଥିତିରେ କାର୍କୁ ବନ୍ଦ କରି ପୁଣି ଥରେ ଅନଲକ୍ କରିବାକୁ ଚେଷ୍ଟା କରନ୍ତୁ।
ଯଦି ସେଣ୍ଟ୍ରାଲ୍ ଲକ୍ କାମ କରୁନାହିଁ, ତେବେ ମାନୁଆଲ୍ ଲକର ବ୍ୟବହାର କରାଯାଇପାରିବ। ଅନେକ କାର୍ରେ ଭିତର ପଟେ ଏକ ‘ଇମରଜେନ୍ସି ଅନଲକ୍ ଲିଭର’ ମଧ୍ୟ ଦିଆଯାଇଥାଏ। ଏହା ସହିତ କାର୍ର ଅନ୍ୟ ପାଖ ଡୋର୍ ଖୋଲିବାକୁ ଚେଷ୍ଟା କରନ୍ତୁ, କାରଣ ଅନେକ ସମୟରେ କେବଳ ଗୋଟିଏ ପାର୍ଶ୍ୱର ଡୋର୍ ଜାମ୍ ହୋଇଥାଏ।
ଯଦି କାର୍ଟି ବନ୍ୟା ବା ପାଣିରେ ଫସିଯାଏ କିମ୍ବା କୌଣସି ଦୁର୍ଘଟଣା ଘଟେ, ତେବେ ତୁରନ୍ତ ଝରକା କାଚ ଭାଙ୍ଗି ବାହାରକୁ ଆସିବା ହିଁ ଶେଷ ବିକଳ୍ପ। ବିଶେଷଜ୍ଞଙ୍କ ମତରେ, କାର୍ରେ ସବୁବେଳେ ଏକ ‘ଇମରଜେନ୍ସି ହାମର୍’ କିମ୍ବା ‘ୱିଣ୍ଡୋ ବ୍ରେକର୍ ଟୁଲ୍’ ରଖିବା ଉଚିତ।
ପ୍ରବଳ ଗରମ ଓ ଖରାପ ମେଣ୍ଟେନାନ୍ସ ମଧ୍ୟ ହୋଇପାରେ ମୁଖ୍ୟ କାରଣ
ଅନେକ ସମୟରେ ଅତ୍ୟଧିକ ଗରମ ଯୋଗୁଁ ମଧ୍ୟ କାର୍ର ଡୋର ଲକ୍ ସିଷ୍ଟମ୍ ପ୍ରଭାବିତ ହୋଇଥାଏ। କ୍ରମାଗତ ଭାବେ ଖରାରେ ଠିଆ ହେଉଥିବା କାର୍ ଗୁଡ଼ିକର ଇଲେକ୍ଟ୍ରୋନିକ୍ ପାର୍ଟସ୍ ଏବଂ ଲକ୍ ମେକାନିଜମ୍ ଗରମ ହୋଇ ଫସିଯାଏ। ଏହା ବ୍ୟତୀତ ପୁରୁଣା ଲକ୍ ସିଷ୍ଟମ୍, ଧୂଳିମଳି ଜମିବା ଏବଂ ଖରାପ ମେଣ୍ଟେନାନ୍ସ ଯୋଗୁଁ ମଧ୍ୟ ଦରଜା ଜାମ୍ ହୋଇଥାଏ। ତେଣୁ ସମୟ ସମୟରେ କାର୍ ଡୋର୍ ଏବଂ ଲକ୍ ସିଷ୍ଟମର ସର୍ଭିସିଂ କରାଇବା ଜରୁରୀ।
ଏକ୍ସପର୍ଟମାନେ ପରାମର୍ଶ ଦିଅନ୍ତି ଯେ, କାର୍ର ପାୱାର୍ ୱିଣ୍ଡୋ ଏବଂ ସେଣ୍ଟ୍ରାଲ୍ ଲକିଂ ସିଷ୍ଟମକୁ କେବେ ହେଲେ ଅଣଦେଖା କରିବା ଉଚିତ ନୁହେଁ। ଯଦି ଲକ୍ ଖୋଲିବା ବା ବନ୍ଦ ହେବାରେ ସାମାନ୍ୟ ବିଳମ୍ବ ଅନୁଭବ ହେଉଛି, ତେବେ ତୁରନ୍ତ ଗ୍ୟାରେଜ୍କୁ ଯାଇ ଏହାର ସଠିକ୍ ଯାଞ୍ଚ କରାଇ ନିଅନ୍ତୁ। ସାମାନ୍ୟ ସତର୍କତା ଏବଂ ସଠିକ୍ ସୂଚନା ଆପଣଙ୍କୁ ଯେକୌଣସି ବଡ଼ ବିପଦରୁ ସୁରକ୍ଷିତ ରଖିବାରେ ସହାୟକ ହୋଇପାରିବ।
