ଜୁଆ ଆଡ୍ଡା ଉପରେ ଚଢ଼ାଉ, ୧୮ ଲକ୍ଷ ଟଙ୍କା ସହ ୧୪ ଟି ମୋବାଇଲ ତାସ ଓ ଜବତ୍

କଟକ : କମିଶନରେଟ ପୋଲିସର ବଡ଼ ଧରଣର ରେଡ । କଟକ ବଜ୍ରକବାଟି ରୋଡରେ ଥିବା ଏକ ହୋଟେଲ ଉପରେ ଚଢାଉ କରି ପୋଲିସ ଏକ ଜୁଆଡି ଗ୍ୟାଙ୍ଗର ୧୩ ଜଣ ସଦସ୍ୟଙ୍କୁ ଗିରଫ କରିବାରେ ସଫଳ ହୋଇଛି । ଏହି ଜୁଆ ଆଡ୍ଡା ଉପରେ ଚଢ଼ାଉ କରି ମଙ୍ଗଳାବାଗ ଥାନା ପୋଲିସ ନଗଦ ୧୮ ଲକ୍ଷ ଟଙ୍କା ଜବତ୍ କରିଛି । ଅଭିଯୁକ୍ତମାନଙ୍କଠାରୁ ୧୪ ଟି ମୋବାଇଲ ଫୋନ୍,ତାସ ଓ ଜୁଆ ଖେଳରେ ବ୍ୟବହୃତ ସାମଗ୍ରୀ, ୬ ଟି ବାଇକ୍ ଓ ଦୁଇଟି କାର୍ ମଧ୍ୟ ଜବତ୍ କରିଛି ପୋଲିସ । ଅଭିଯୁକ୍ତମାନେ କଟକ,ଭଦ୍ରକ, ଗଞ୍ଜାମ,ଖୋର୍ଦ୍ଧା, ପୁରୀ ଜିଲ୍ଲାର ବୋଲି ଏକ ସାମ୍ବାଦିକ ସମ୍ମିଳନୀରେ କଟକ ଡିସିପି ସୂଚନା ଦେଇଛନ୍ତି। ଗିରଫ ଅଭିଯୁକ୍ତଙ୍କ ଭିତରେ କିଛି ପେଶାଦାର ଅପରାଧୀ ଅଛନ୍ତି । ଯେଉଁମାନଙ୍କ ନାଁରେ ବଡ଼ ଧରଣର ଅପରାଧିକ ମାମଲା ରହିଥିବା ଡିସିପି କହିଛନ୍ତି। ଏକ ବିଶେଷ ସୂତ୍ରରୁ ଲିଡ୍ ପାଇ ଏହି ରେଡ କରାଯାଇଥିବା କଟକ ଡିସିପି କହିଛନ୍ତି। ଏହି ଚଢ଼ାଉ ପାଇଁ ଏକ ସ୍ୱତନ୍ତ୍ର ଟିମ୍ ଗଠନ କରିଥିଲା କମିସନରେଟ୍ ପୋଲିସ।