ସୁନ୍ଦରଗଡ଼: ସୁନ୍ଦରଗଡ଼ ଜିଲ୍ଲାରେ ଘଟିଥିବା ଦୁଇଟି ବଡ଼ ଡକାୟତି ଓ ଲୁଟ ମାମଲାର ପର୍ଦ୍ଦାଫାଶ । ଧୁରୁଆଡିହି ଓ ହେମଗିର ଥାନା ଅଞ୍ଚଳରେ ଘଟିଥିବା ଦୁଇଟି ପୃଥକ ଘଟଣାରେ ୧୨ ଅଭିଯୁକ୍ତ ଗିରଫ । ଲୁଟ ହୋଇଥିବା ନଗଦ ଟଙ୍କା, କାର, ବାଇକ ଓ ମୋବାଇଲ ଫୋନ ସମେତ ବିଭିନ୍ନ ସାମଗ୍ରୀ ଜବତ କରିଛି ପୋଲିସ । ଗତକାଲି ରାତି ପ୍ରାୟ ୮ଟା ବେଳେ ଧୁରୁଆଡିହି ଥାନା ଅନ୍ତର୍ଗତ ବିରବିରା ଗ୍ରାମରେ ଜଣେ ଡାକ୍ତରଙ୍କ ଘରୁ ୧ ଲକ୍ଷ ୬୭ ହଜାର ଟଙ୍କା ଓ ଏକ ମୋବାଇଲ ଫୋନ ଲୁଟି ନେଇଥିଲେ ଦୁର୍ବୃତ୍ତ। ଅଭିଯୁକ୍ତମାନେ କିଞ୍ଜିର୍ମା ଜଙ୍ଗଲରେ ଲୁଚି ରହିଥିଲେ । ଲୁଟେରାଙ୍କୁ ଗିରଫ କରିବା ସହ ତାଙ୍କ ଠାରୁ ସମସ୍ତ ଟଙ୍କା ଓ ମୋବାଇଲ ଜବତ କରିଛି ପୋଲିସ ।
ସେହିପରି ହେମଗିର ଥାନା ଅଞ୍ଚଳରେ ଜଣେ ଠିକାଦାରଙ୍କୁ ବନ୍ଧୁକ ଦେଖାଇ କାର ଓ ନଗଦ ଟଙ୍କା ଲୁଟ ମାମଲାରେ ମଧ୍ୟ ପୋଲିସ ୬ ଅଭିଯୁକ୍ତଙ୍କୁ ଗିରଫ କରିଛି ସେମାନଙ୍କ ନିକଟରୁ ଲୁଟ ସାମଗ୍ରୀ ଉଦ୍ଧାର କରାଯାଇଛି । ଗିରଫ ହୋଇଥିବା ଅନେକ ଅଭିଯୁକ୍ତଙ୍କ ନାଁରେ ପୂର୍ବରୁ ବିଭିନ୍ନ ଅପରାଧିକ ମାମଲା ରହିଛି । ହେମଗିର ଲୁଟ ମାମଲାରେ ଧରାପଡ଼ିଥିବା ୬ ଜଣଙ୍କ ମଧ୍ୟରୁ ୩ ଜଣ ନାବାଳକ ଥିବା ଜଣାପଡ଼ିଛି ।
