କଟକ : ସ୍ବାଭାବିକ ହେଉଛି ଅଭିଜିତଙ୍କ ଶ୍ବାସକ୍ରିୟା । ତାଙ୍କୁ ଭେଣ୍ଟିଲେଟରରୁ ଆଇସିୟୁକୁ ସ୍ଥାନାନ୍ତର କରାଯାଇଛି । ଲୋକପ୍ରିୟ ସଙ୍ଗୀତକାର ଅଭିଜିତ ମଜୁମଦାରଙ୍କ ସ୍ବାସ୍ଥ୍ୟବସ୍ଥାରେ ଉନ୍ନତି ପରିଲିକ୍ଷିତ ହୋଇଛି । ସେ ଏମସ ଭୁବନେଶ୍ବରର ICUରେ ଚିକିତ୍ସାଧୀନ ଅଛନ୍ତି । ତାଙ୍କର କିଡନୀ ଓ ଲିଭର ଅବସ୍ଥାରେ ପୂର୍ବପେକ୍ଷା ଉନ୍ନତି ପରିଲିକ୍ଷିତ ହୋଇଛି । ନିମୋନିଆରେ ସୁଧାର ଆସିଛି । ପୁଣି ଥରେ ବ୍ରେନ୍ MRI ହୋଇଛି । ମାତ୍ର ସେ ଏବେବି କୋମାରେ ଅଛନ୍ତି। ଅଭିଜିତଙ୍କ ସ୍ବାସ୍ଥ୍ୟରେ ଉନ୍ନତି ଘଟିବା ପରେ ପ୍ରଶଂସକଙ୍କ ମହଲରେ ଉତ୍ସାହ ଦେଖାଦେଇଛି।
ସୂଚନାଯୋଗ୍ୟ, ଲିଭର ଜନିତ ରୋଗରେ ଗତ କିଛି ମାସ ହେବ ପୀଡ଼ିତ ଅଛନ୍ତି ଅଭିଜିତ ମଜୁମଦାର । ଅଭିଜିତଙ୍କୁ ପ୍ରଥମେ କଟକ ସ୍ଥିତ ଏକ ଘରୋଇ ହସ୍ପିଟାଲରେ ଗତ ୩୧ ତାରିଖ ଦିନ ଭର୍ତ୍ତି କରାଯାଇଥିଲା । ହେଲେ ସେଠାରେ ତାଙ୍କ ସ୍ବାସ୍ଥ୍ୟ କ୍ଷେତ୍ରରେ ଉନ୍ନତି ଦେଖାନଯିବାରୁ ତାଙ୍କୁ ଭୁବନେଶ୍ବର ଏମ୍ସକୁ ସ୍ଥାନାନ୍ତର କରାଯାଇଛି । ତେବେ ଚିନ୍ତାର ବିଷୟ ହେଲା, ଏମ୍ସରେ ଆଡମିଟ୍ ହେଉ ହେଉ ଦାଦାଙ୍କ ସ୍ବାସ୍ଥ୍ୟାବସ୍ଥା କିଛି ଦିନ ତଳେ ସଙ୍କଟାପନ୍ନଥିଲା ବୋଲି ଏମ୍ସ କର୍ତ୍ତୃପକ୍ଷ ସୂଚନା ଦେଇଥିଲେ ।
