ବାଲେଶ୍ୱର ଜିଲ୍ଲା ଜଳେଶ୍ବର ପୌରପାଳିକା ତରଫରୁ ଗଠିତ ସ୍ବତନ୍ତ୍ର ଏନଫୋର୍ସମେଣ୍ଟ ଟିମ୍ ଜଳେଶ୍ବର ସହରର କେନ୍ଦ୍ର ସ୍ଥଳରେ ଥିବା ଥାନା ବଜାର ମାଛ ମାର୍କେଟ ଉପରେ ଚଢଉ କରିବା ପରେ ଏସବୁ ସତ ପଦାକୁ ଆସିଛି । ଚଢାଉ ସମୟରେ ବ୍ୟବସାୟୀମାନେ କିପରି ଗ୍ରାହକଙ୍କୁ ଓଜନରେ ଠକିବା ସହ ସ୍ବାସ୍ଥ୍ୟ ପାଇଁ ହାନିକାରକ ରଙ୍ଗ ଏବଂ କେମିକାଲ ବୋଳା ମାଛ ବିକ୍ରି କରୁଥିଲେ, ତାହା ଜଣାପଡ଼ଛି । ଜଳେଶ୍ବରରେ ଥିବା ଏହି ମାଛ ମାର୍କେଟ ଉପରେ ହଜାର ହଜାର ଲୋକେ ନିର୍ଭର କରନ୍ତି । ତେବେ ଏହି ବଜାରରେ ମାଛ ବିକ୍ରି ସମୟରେ ନିୟମିତ ଭାବେ ଓଜନରେ ଠକେଇ, ମାଛକୁ ସତେଜ ରଖିବା ପାଇଁ କେମିକାଲ ବୋଳା ମାଛ ବିକ୍ରି ହେଉଥିବା ନେଇ ବାରମ୍ବାର ଅଭିଯୋଗ ଆସୁଥିଲା । ତେବେ ଜିଲ୍ଲାପାଳଙ୍କ ନିର୍ଦ୍ଦେଶରେ ପ୍ରଶାସନ ପକ୍ଷରୁ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା । ଜଳେଶ୍ବର ପୌର ପରିଷଦର କାର୍ଯ୍ୟ ନିର୍ବାହୀ ଅଧିକାରୀଙ୍କ ନେତୃତ୍ବରେ ଜଳେଶ୍ବର ଥାନାଧିକାରୀ, ଖାଦ୍ୟ ନିରାପତ୍ତା ଅଧିକାରୀ, ଓଜନ ଓ ପରିମାପ ବିଭାଗର ଅଧିକାରୀ, ବାଲେଶ୍ବର ଏନଫୋର୍ସମେଣ୍ଟ ଟିମ୍ ଏବଂ ଜଳେଶ୍ବର ପୌରପାଳିକାର କର୍ମଚାରୀଙ୍କୁ ନେଇ ଗଠିତ ଟିମ୍ ଚଢ଼ାଉ କରିଥିଲେ । ୫ ଜଣ ବ୍ୟବସାୟୀ ବ୍ୟାପକ ଅନିୟମିତତା କରି ଧରା ପଡିବାରୁ ସେମାନଙ୍କ ଠାରୁ ୫ ହଜାର ଟଙ୍କା ଜରିମାନା ଆଦାୟ କରାଯାଇଥିଲା । ସେହିପରି ଅନ୍ୟ ବ୍ୟବସାୟୀମାନଙ୍କୁ ଟ୍ରେଡ୍ ଲାଇସେନ୍ସ ତଥା ଓଜନ ମାପ ବିଭାଗରୁ ଦୋକାନର ବଟକରା ପଞ୍ଜୀକରଣ କରିବା ପାଇଁ ନୋଟିସ ଦିଆ ଯାଇଥିଲା ।
