ଭୁବନେଶ୍ୱର : ବାତ୍ୟାର ଗତିପଥ, ତୀବ୍ରତା ଓ ସମ୍ଭାବ୍ୟ କ୍ଷୟକ୍ଷତି ସମ୍ପର୍କରେ ଆଗୁଆ ସୂଚନା ପାଇବା ଏବେ ଆହୁରି ସହଜ ହେବ । ଭାରତୀୟ ପାଣିପାଗ ବିଭାଗ ବା IMD ଏଥିପାଇଁ ଏକ ନୂଆ ଡିଜିଟାଲ୍ ବ୍ୟବସ୍ଥା ଆରମ୍ଭ କରିଛି । ଏହାର ନାମ ରହିଛି ସାଇକ୍ଲୋନ୍ ୱାର୍ଣ୍ଣିଂ ଆଣ୍ଡ୍ ମେରାଇନ୍ ୱେଦର ସର୍ଭିସେସ୍ ଡିସିସନ୍ ସପୋର୍ଟ ସିଷ୍ଟମ୍ । ଅକ୍ଟୋବର ୧୨ ତାରିଖରେ ଏହି ବ୍ୟବସ୍ଥାକୁ ଦେଶ ଉଦ୍ଦେଶ୍ୟରେ ଉତ୍ସର୍ଗ କରାଯାଇଛି । ଏହି ନୂଆ ବ୍ୟବସ୍ଥା ମାଧ୍ୟମରେ ବାତ୍ୟା କେଉଁ ଦିଗରେ ଗତି କରୁଛି, କେତେ ଶକ୍ତିଶାଳୀ ହୋଇପାରେ, କେଉଁ ଅଞ୍ଚଳରେ କେତେ ବେଗରେ ପବନ ବହିବ ଏବଂ କେଉଁଠି ପ୍ରବଳ ବର୍ଷା ହେବାର ଆଶଙ୍କା ରହିଛି, ସେ ସମ୍ପର୍କରେ ସୂଚନା ମିଳିପାରିବ । ସମୁଦ୍ରରେ ଜୁଆର ଜନିତ ଜଳସ୍ତର ବୃଦ୍ଧି ଓ ନଦୀ ଅବବାହିକାରେ ସମ୍ଭାବ୍ୟ ବର୍ଷା ସମ୍ପର୍କରେ ମଧ୍ୟ ଆକଳନ ଉପଲବ୍ଧ ହେବ ।
ୱେବ୍ଜିଆଇଏସ୍ ଆଧାରିତ ଏହି ପ୍ଲାଟଫର୍ମରେ ଇଣ୍ଟରଆକ୍ଟିଭ୍ ମ୍ୟାପ୍ ଓ ବିଭିନ୍ନ ଚିତ୍ର ମାଧ୍ୟମରେ ପାଣିପାଗ ସମ୍ପର୍କିତ ତଥ୍ୟ ଦେଖିହେବ । ବିଶେଷକରି କୌଣସି ନିର୍ଦ୍ଦିଷ୍ଟ ଅଞ୍ଚଳ ପାଇଁ କେତେ ବିପଦ ରହିଛି, ତାହା ବୁଝିବାରେ ଏହି ବ୍ୟବସ୍ଥା ସହାୟକ ହେବ । ଫଳରେ ବାତ୍ୟା ପୂର୍ବରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର, ଉଦ୍ଧାରକାର୍ଯ୍ୟ ଓ ଅନ୍ୟାନ୍ୟ ପ୍ରସ୍ତୁତି ପାଇଁ ପ୍ରଶାସନ ଠିକ୍ ସମୟରେ ନିଷ୍ପତ୍ତି ନେଇପାରିବ । ଅକ୍ଟୋବରରୁ ଡିସେମ୍ବର ପର୍ଯ୍ୟନ୍ତ ବାତ୍ୟା ଋତୁକୁ ଦୃଷ୍ଟିରେ ରଖି IMD ପକ୍ଷରୁ ଆୟୋଜିତ ପ୍ରାକ୍ବାତ୍ୟା ପ୍ରସ୍ତୁତି ବୈଠକରେ ଏହି ନୂଆ ବ୍ୟବସ୍ଥାର ଶୁଭାରମ୍ଭ କରାଯାଇଛି । ବୈଠକରେ ଅଧ୍ୟକ୍ଷତା କରିଥିଲେ IMD ମହାନିର୍ଦ୍ଦେଶକ ଡକ୍ଟର ମୃତ୍ୟୁଞ୍ଜୟ ମହାପାତ୍ର । ସେ ବିଶ୍ୱ ପାଣିପାଗ ସଂଗଠନର ତୃତୀୟ ଉପସଭାପତି ମଧ୍ୟ ଅଛନ୍ତି ।
ଏହି ବୈଠକରେ ୩୦ରୁ ଅଧିକ ସଂସ୍ଥାର ପ୍ରାୟ ୨୩୦ ଜଣ ପ୍ରତିନିଧି ଯୋଗଦେଇଥିଲେ। ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ, ଏନ୍ଡିଆର୍ଏଫ୍, ସ୍ୱରାଷ୍ଟ୍ର ମନ୍ତ୍ରଣାଳୟ, ନୌସେନା, ବାୟୁସେନା, ତଟରକ୍ଷୀ ବାହିନୀ, କେନ୍ଦ୍ରୀୟ ଜଳ ଆୟୋଗ ଏବଂ ଉପକୂଳବର୍ତ୍ତୀ ରାଜ୍ୟଗୁଡ଼ିକର ପ୍ରତିନିଧି ଏଥିରେ ସାମିଲ ହୋଇଥିଲେ । ବୈଠକରେ ନୂଆ ଡିଜିଟାଲ୍ ବ୍ୟବସ୍ଥାର ସିଧାସଳଖ ପ୍ରଦର୍ଶନ କରାଯିବା ସହ ବାତ୍ୟା ମୁକାବିଲା ପ୍ରସ୍ତୁତି ଓ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ଉପରେ ଆଲୋଚନା ହୋଇଥିଲା। ଏପ୍ରିଲ ମାସର ପୂର୍ବ ବୈଠକରେ ଦିଆଯାଇଥିବା ପରାମର୍ଶ ଉପରେ କେତେ କାର୍ଯ୍ୟକାରୀ ହୋଇଛି, ତାହାର ମଧ୍ୟ ସମୀକ୍ଷା କରାଯାଇଥିଲା ।
ଉଲ୍ଲେଖଯୋଗ୍ୟ ଯେ, ଅକ୍ଟୋବର ୧୨ ତାରିଖରେ ହିଁ ୨୦୧୩ ମସିହାରେ ଫାଇଲିନ୍ ଏବଂ ୨୦୧୪ରେ ହୁଡ୍ହୁଡ୍ ବାତ୍ୟା ସ୍ଥଳଭାଗ ଅତିକ୍ରମ କରିଥିଲା । ଏହି ଦୁଇ ବାତ୍ୟାର ସଫଳ ଆଗୁଆ ପୂର୍ବାନୁମାନ ଭାରତର ବାତ୍ୟା ସତର୍କତା ବ୍ୟବସ୍ଥା ପାଇଁ ଏକ ବଡ଼ ସଫଳତା ଥିଲା ବୋଲି IMD କହିଛି । ୨୦୦୮ ମସିହାରୁ IMD ପ୍ରତିବର୍ଷ ଦୁଇଥର ଏଭଳି ପ୍ରସ୍ତୁତି ବୈଠକ ଆୟୋଜନ କରିଆସୁଛି । ଏହାର ମୁଖ୍ୟ ଉଦ୍ଦେଶ୍ୟ ହେଉଛି ବାତ୍ୟାର ସଠିକ୍ ପୂର୍ବାନୁମାନକୁ ଆଧାର କରି ଠିକ୍ ସମୟରେ ପଦକ୍ଷେପ ନେବା ଏବଂ ଧନଜୀବନ କ୍ଷୟକ୍ଷତି ଯଥାସମ୍ଭବ କମାଇବା। ନୂଆ ପ୍ଲାଟଫର୍ମ IMD ଏବଂ ଆଞ୍ଚଳିକ ବିଶେଷ ପାଣିପାଗ କେନ୍ଦ୍ରର ୱେବ୍ସାଇଟ୍ ମାଧ୍ୟମରେ ଉପଲବ୍ଧ ହେବ । ଏହା ଉଭୟ ବିପର୍ଯ୍ୟୟ ପରିଚାଳନା ସଂସ୍ଥା ଓ ସାଧାରଣ ଲୋକଙ୍କ ପାଇଁ ଉପଯୋଗୀ ହେବ ବୋଲି ଆଶା କରାଯାଉଛି ।
